KNĂM ÊMA LEH HRUÊ AÊ DIÊ TAL 32 YAN HLĂM THǓN
Hră Dlăng 2 Ga 4-9
Hlei lŏ dôk hlăm klei mtô, mnuih anăn mâo Aê Diê Ama wăt Aê Diê Anak.
Hdruôm Hră Kpă mơ̆ng Hră tal dua Pô Kpă Pôhan ƀĭng kna.
Ơ mniê jing mnuih mâo Aê Diê hrŏng ruah, kâo hỡk m’ak sơnăk kyua ƀuh tuôm leh hlăm phung anak aneh Ih, phung hdĭp hlăm klei sit, djŏ msě si klei bhiǎn drei mâo mă tŭ leh mơ̆ng Aê Diê Ama. Ơ mniê, ară anei kâo akâo kơ Ih klei anei – anei amâo djŏ jing sa klei bhiǎn mrâo kâo čih ôh, ƀiădah jing klei bhiǎn drei mâo leh dỡng mơ̆ng mphŭn dơ̆ng anăn jing: drei bhiǎn bi khăp bě hdăng. Bi khăp jing hdĭp hluê si djăp klei bhiǎn Aê Diê. Msě si diih mâo hmư̆ leh dơ̆ng mỡng mphŭn dơ̆ng, klei bhiǎn anei jing: diih hdĭp bhiǎn hlăm klei khăp pap.
Kyuadah mâo lu mnuih mplur lar ƀar leh tar rŏng lăn, digơ̆ jing phung amâo hưn mdah ôh Khua Yêsu Krist jing Pô hriê leh wăt mbliữ jing leh mnuih. Anăn jing mnuih mplư wăt jing mnuih kdơ̆ng lhiăr hŏng Krist. Diih răng bě čiăng tlaih bi luč hě djăp ya klei diih mâo ngă leh, ƀiădah pioh mă tŭ ênŭm ênap klei pah mưn. Hlei pô kdlŭt leh êlam, amâo lŏ dôk hlăm klei mtô mơ̆ng Khua Krist, sơnăn amâo mâo Aê Diê ôh. Bi hlei dôk hlăm klei mtô, sơnăn mnuih anăn mâo Aê Diê Ama wăt Aê Diê Anak.
Anǎn jing Klei Blŭ Aê Diê.
KLEI MMUÑ HĐĂP KPĂ Tv 118,1-2.10-11.17-18 (Đ. c.1b)
Jih jang: Jăk m’ak yơh kơ pô tui hluê klei bhiăn Aê Diê.
Sa čô: 1) Jăk m’ak yơh kơ pô hdĭp klei hdĭp ênŭm jăk, thâo tui hluê klei bhiăn Aê Diê. Jăk m’ak yơh kơ pô hluê ngă klei Aê Diê čiăng, jih ai jih tiê tui duah Aê Diê. Jih jang.
2) Ơ Aê Diê, kâo jih ai tiê tui duah Ih, akâo đăm lui kâo ngă soh klei Ih mtrŭn mtă. Asăp Ih ƀuăn, ai tiê kâo k’up ba, čiăng amâo tuôm kdỡng lhiăr. Jih jang
3) Akâo mdah brei ai kmah pap kơ dĭng buăl Ih anei, čiăng kơ kâo dưi mâo hdĭp wăt gư̆t pioh asăp Ih. Akâo mblang brei ală čiăng kơ kâo thâo ƀuh, klei bhiǎn Ih yuôm bhăn êdimima. Jih jang.
DRI ÂO MNUÑ ÊLÂO KƠ KLEI MRÂO MRANG JĂK Lc 21, 28
Allêluia. Allêluia. Diih dôk dơ̆ng kpă leh anăn kngưr kŏ, kyuadah diih dơ̆ng mâo bi mtlaih. Allêluia.
KLEI MRÂO MRANG JĂK Lc 17, 26–37
Hruê Anak Mnuih mâo pŏk mdah ăt msě sơnăn mơh.
Klei Mrâo Mrang jăk Khua Yêsu Krist tui si Pô Kpă Luk
Hlăk anăn, Khua Yêsu lač kơ phung ƀĭng kna sơnei: “Ăt msě si ênuk Noê, si klei mâo truh leh, sơnăn hlăm hruê Anak mnuih, klei mta ăt sơrăng mâo truh msě sơnăn mơh. Phung mnuih huă mnăm, bi dôk ung mô̆, tơl truh kơ hruê Nôê mŭt hlăm Kŭm-păn, leh anăn êa lip truh mdjiê bi rai jih. Klei mta ăt mâo truh msě sơnăn mơh hlăm ênuk Lot: Phung mnuih huă mnăm, blei mnia, ƀuh pla, mdơ̆ng pŭk sang. Ƀiădah hruê Lot kbiă mơ̆ng ƀuôn Sôdôm, sơnăn Aê Diê brei hjan pui wăt kneh pui lě mơ̆ng adiê mdjiê bi rai jih. Klei mta ăt sơrăng mâo truh msě sơnăn mơh, hruê Anak Mnuih mâo pok mdah.
“Hruê anăn, hlei dôk ti dlông čuôr sang ƀiădah dŏ dô ti sang gŭ, anăn đăm trŭn mă ôh. Ăt sơnăn mơh, hlei dôk ti hma sơnăn đăm lŏ plăk wĭt ôh. Hdơr bě kơ klei mô̆ Lot. Hlei duah êlan mgang pioh asei hdĭp pô, sơnăn sơrăng luč; bi hlei jhŏng săn bi luč asei hdĭp pô, sơnăn sơrăng mâo kriê pioh asei hdĭp. Kâo lač brei diih thâo: mlam anăn, dua čô dôk pĭt mbĭt hlăm sa boh jhưng, sơnăn sa čô mâo arăng sơrăng mă ba, bi sa čô arăng adôk lui. Dua čô mniê hrăm dôk kwă kpŭng, sơnăn sa čô mâo arăng sơrăng mă ba, sa čô arăng adôk lui. Dua čô êkei dôk hlăm hma, sa čô mâo arăng sơrăng mă ba, bi sa čô arăng adôk lui”. Phung Bĭng kna ha êmuh Khua Yêsu: “Ơ Khua, ti anôk lě ?” Ñu lač kơ digơ̆: “Ti anôk mâo mnơ̆ng djiê, ti anăn phung tlang nao djim”.
Anǎn jing Klei Blŭ Aê Diê.