KNĂM NĂM LEH HRUÊ AÊ DIÊ TAL 32 YAN HLĂM THǓN
Hră Dlăng 3 Ga 5-8
Drei bhiăn drông jum phung ayŏng adei, čiăng mguôp ai hlăm bruă hưn mtruh klei sĭt.
Hdruôm Hră Kpă mơ̆ng Hră tal Tlâo Pô Kpă Pôhan ƀĭng kna m’ĭt.
Ơ Gai-ô khăp êdimi, ih ngă hluê klei đao hlăm djăp bruă ih ngă kơ phung ayŏng adei, khă kơ do jing tuê êgar. Digỡ bi mklă leh kơ knhuah kmah khăp ih ti anăp Êpul Kpă. Ih sơrăng ngă sa mta bruă jăk, tơdah ih đru kơ klei digỡ đuê̆ hiu djŏ năng ti anăp Aê Diê. Djŏ sơnăn, kyua anăn Khua Myang yơh, digỡ đuễ nao leh hlŏng amâo mă tŭ ôh sa mta mơ̆ng phung tuê. Sơnăn, drei bhiăn jum phung mnuih msě sơnăn, čiăng mguôp ai hlăm bruă hưn mtruh klei sĭt.
Anǎn jing Klei Blŭ Aê Diê.
KLEI MMUÑ HĐĂP KPĂ Tv 111,1-2.3-4.5-6 (Đ. c.1a)
Jih jang: Jăk m’ak, mnuih hŭi mpŭ kơ Aê Diê.
Sa čô: 1) Jăk m’ak, mnuih hŭi mpŭ kơ Aê Diê, khăp wăt čiăng djăp asăp mtrun Aê Diê mtă brei. Ti rŏng lăn anak čô digơ̆ sơrăng ktang kjăp, djuê ana phung kpă jăk mâo Aê Diê pap hmưi brei klei jăk. Jih jang.
2) Boh gŏ digơ̆ mdrong kjăp sah prŏng, knhuah kpă ênô digỡ dôk nao truh kơ hlŏng lar. Krah klei mmăt trơ̆ng blung boh mngač mtrang phung kpă jăk : anǎn jing mnuih kmah pap kmah khăp wăt kpă ênô. Jih jang
3) Jăk m’ak yơh kơ mnuih thâo pap wăt brei mañ, thâo tui hluê klei djŏ bhiăn čiăng prăp êmiêt bruă pô. Digơ̆ amâo sơrăng tuôm rŭng răng ôh, hlŏng lar arăng adôk hdơr mni kơ mnuih jăk ênô. Jih jang.
DRI ÂO MNUÑ ÊLÂO KƠ KLEI MRÂO MRANG JĂK x. 2 Tx 2,14
Allêluia. Allêluia. Aê Diê yua leh Klei Mrâo Mrang Jăk čiăng iêô jak drei, čiăng kơ drei dưn klei guh k’ang Khua drei jing Khua Yêsu Krist.Allêluia.
KLEI MRÂO MRANG JĂK Lc 18,1-8
Aê Diê dlăng ktuê phung Ñu hrŏng ruah leh, hruê mlam nanao akâ kwưh kơ Ñu.
Klei Mrâo Mrang jăk Khua Yêsu Krist tui si Pô Kpă Luk
Hlăk anăn, Khua Yêsu yăl dliê kơ phung Ƀĭng kna klei bi hriêng ti tluôn anei, čiăng mtô diñu bhiăn kwưh wah lač nanao, amâo dưi êdu ai ôh. Ñu lač: “Hlăm ƀuôn prŏng adih, mâo sa čô khua phat kđi. Ñu amâo hŭi mpŭ kơ Aê Diê ôh, leh anăn dlăng kơ arăng msě h’aĭ mang. Hlăm ƀuôn prŏng anăn, ăt mâo mơh sa čô mniê djiê ung. Gỡ anei lu blư̆ leh hriê lač kơ ñu : ‘Pô roh hŏng kâo ngă jhat kơ kâo, akâo ih phat ksiêm brei klă mngač.’ Sui hruê leh, ñu amâo mđing ôh. Ƀiădah knhal tuč, ñu mǐn hlăm ai: ‘Khă kâo amâo huĭ mpŭ kơ Aê Diê, wăt dlăng kơ arăng msě h’aĭ mang, ƀiădah mniê djiê ung anei bi rŭng nanao, sơnăn kâo phat mkra brei wě, huǐ dah mniê anăn truăn hriê nao, ngă kơ kâo ruă kŏ dlô đei.’
Leh anăn Khua Yêsu lač: “Diih hmư̆ yơ̆ êkei khua phat kđi amâo Kpă anăn lač ! Sơnăn yă Aê Diê amâo phat ksiêm hĕ klă mngač kơ phung Ñu ruah leh, hruê mlam dôk akâo kwưh nanao kơ Ñu ? Yă Ñu brei kơ digơ̆ dôk guôn nao deh ? Kâo lač brei diih thâo, Ñu sơrăng djăl phat ksiêm brei kơ digơ̆. Ƀiădah hlăk Anak Mnuih hriê, Ñu adôk ƀuh mơh hĕ ai tiê đaŏ ti lăn ala anei ?”
Anǎn jing Klei Blŭ Aê Diê.