Knăm Pă Leh Hruê Aê Diê Tal 32 Yan Hlăm Thŭn
Hră Dlăng Plm, 7-20
Akâo ih drông jum bě ñu, amâo djŏ msě si sa čô hlŭn mnă ôh, ƀiădah msě si sa čô ayŏng adei khăp h’iêng êdimima.
Hdruôm Hră Kpă mơ̆ng Hră Pô Kpă Pôl Ƀĭng kna m’ĭt kơ Philêmon .
Ơ Philêmôn khăp êdimima, kâo hơ̆k m’ak sơnăk wăt mâo klei bi juh, hlăk ƀuh knhuah kmah khăp ih, kyuadah ih ngă leh kơ ai mǐn phung mnuih hlăm ƀuôn sang kpă mâo klei hơ̆k kdơ̆k.
Kyua anăn, khă kyua klei bi mguôp hŏng Khua Krist, kâo mâo djăp klei jhŏng ai čiăng mtă brei ih ngă klei ih bhiăn ngă. Ƀiădah kâo khăp iêô jak ai tiê kmah khăp ih hĭn, čiăng akâo kơ ih ngă klei anăn. Kâo Pôl, sa čô mnuih mduôn leh wăt hĭn ti anăn, sa čô mnuih arăng dôk krư̆ kyua Khua Krist Yêsu, kâo ăt ik akâo mơh kơ ih brei anak kâo, anak kâo kkiêng leh hlăm anôk klei săng đai, anăn jing Onêsimô, pô mphŭn dô tĭng kơ ih jing h’aĭ mang, sơnăn ară anei jing leh mnuih tŭ dưn wăt kơ ih wăt kơ kâo, kâo akâo m’ĭt ñu kơ ih; akâo ih drông jum bě ñu mnuih sa tian prôč hŏng kâo. Bi kâo, kâo ăt čiăng mơh kơ̆ng ñu dôk hŏng kâo, čiăng ñu bi hrô ih ngă bruă kơ kâo êjai arăng bi hnuh kâo kyua Klei Mrâo Mrang Jăk. Ƀiădah kâo amâo čiăng ngă ôh sa mta hlŏng ka mâo klei tŭ ư mơ̆ng ih, huĭ bruă jăk ih ngă msě si mgô̆, amâo djŏ čŏng thơ̆ng ôh. Ñu kbưi leh hŏng mâo sa ênuk, năng ai kyua ih čiăng lŏ mâo ñu hlŏng lar, amâo djŏ lŏ mâo sa čô hlŭn mnă ôh, ƀiădah hrô kơ sa čô hlŭn mnă, sơnăn mâo hě sa čô ayŏng adei khăp h’iêng êdimi; kơ kâo jing sơnăn leh, ƀai hĭn kơ ih knư̆ lŏ sĭt suôr êdimima, wăt tĭng kơ klei khăp mnuih wăt tĭng kơ ayŏng adei hlăm Aê Diê. Sơnăn, tơdah ih yap kâo jing ƀĭng hrăm sa klei đaŏ, sơnăn akâo ih drông jum bě ñu msě si drông jum kâo pô. Tơdah ñu ngă leh kơ hrŏ hriêt amâo dah ya klei ñu đuôm nư ih, sơnăn kâo akâo tŭ jih… Kâo yơh Pôl, kiê kngan kâo pô čih klei anei: kâo sơrăng lŏ i wĭt. Kâo tlaih lač tŭ mơh kơ ih jing kâo adôk đuôm nư ih: nư anăn jing ih yơh. Djŏ leh, Ơ Philêmôn, akâo brei kâo dưn klei hơ̆k m’ak anăn hlăm Aê Diê. Ih brei bě ai mǐn kâo dưi mâo hơ̆k kdơ̆k hlăm Khua Krist.
Anǎn jing Klei Blŭ Aê Diê.
KLEI MMUÑ HĐĂP KPĂ Tv 145,6b-7a.7b-8.9-10 (Đ.c.5c)
Jih jang: Jăk m’ak yơh mnuih mâo Aê Diê Yakôb mgang kriê.
Sa čô: 1) Aê Diê jing Pô pioh nanao ai tiê sĭt suôr hlŏng lar, phat mkra klă mngač kơ mnuih arăng ktư̆ juă, brei mnỡng ƀỡng huă kơ phung êpa ƀơ̆ng. Jih jang.
2) Aê Diê mtlaih bi êngiê hlei phung arăng krư̆ kđăl, Aê Diê bi mblang ală kơ phung bum. Aê Diê brei kơ phung arăng ăp gữ lŏ rŭ kgŭ dơ̆ng, Aê Diê khăp kơ phung kpă ênô. Jih jang
3) Aê Diê đru mgang phung tuê čar êgar, Ñu đru krơ̆ng phung êrĭt wăt mniê djiê ung. Ƀiădah bi rai mnê̆č phung jhat ƀai. Ñu djă păn klei kdrưh mtao nanao hlŏng lar. Ơ Siôn, Aê Diê ih kĭa kriê guh k’ang hlŏng lar. Jih jang.
DRI ÂO MNUÑ ÊLÂO KƠ KLEI MRÂO MRANG JĂK Ga 15, 5
Allêluia. Allêluia. Khua Myang lač: Kâo jing ana boh kriak ƀâo, diih jing adhan. Hlei dôk hlăm Kâo, leh anăn Kâo dôk hlăm ñu anăn, sơnăn ñu anăn bi mboh lu boh mnga. Allêluia.
KLEI MRÂO MRANG JĂK Lc 17, 20-25
Ênuk Mtao Aê Diê dôk ti krah diih.
Klei Mrâo Mrang jăk Khua Yêsu Krist tui si Pô Kpă Luk
Hlăk anăn, êkei Pharisi êmuh Khua Yêsu hbil Ênuk Mtao Aê Diê truh. Ñu wĭt lač: “Ênuk Mtao Aê Diê amâo hriê ôh msě si sa mta klei ktuê dưi thâo ƀuh. Leh anăn arăng amâo sơrăng lač ôh: ‘Ně ti anei !’ amâo dah ‘Duh ti adih!’ kyuadah ně anei Ênuk Mtao Aê Diê dôk ti krah diih”.
Leh anăn Khua Yêsu lač kơ phung Bĭng kna: “Sơrăng truh ênuk diih hmăng čiăng dưi mâo ƀuh sa hlăm djăp hruê Anak mnuih đuč, ƀiădah ăt kăn dưi mâo ƀuh lei. Arăng sơrăng lač kơ diih: ‘Ñu dôk ti adih !’ amâo dah ‘Ně Ñu dôk ti anei !’ Diih đăm nao, đăm êran hluê ôh. Kyuadah si kmlă mklǎi mtrang mngač dơ̆ng mơ̆ng knhal adiê anei truh kơ knhal adiê adih, sơnăn Anak Mnuih hlăm hruê Ñu ăt sơrăng msě sơnăn mơh. Ƀiădah êlâo kơ anăn, Ñu bhiăn tŭ lu klei knap mñai wăt phung mnuih ênuk anei lui hě”.
Anǎn jing Klei Blŭ Aê Diê.