HRUÊ 12 MLAN 11
PÔ KPĂ MARTINÔ , AMA PRŎNG, FÊT HDƠR
Thánh Martinô, giám mục. Lễ nhớ.
Hră Dlăng Tt 3, 1-7
Drei soh čhuai leh, biădah kyua Aê Diê dlăng pap, sơnăn Ñu bi mtlaih leh drei.
Hdruôm Hră Kpă mơ̆ng Hră Pô Kpă Pôl Ƀĭng kna m’ĭt kơ Titô .
Ơ Titô khăp êdimi, ih mtă mtăn bě kơ djăp čô bhiăn gư̆t mpŭ wăt gư̆t asăp phung păn kiă kriê, phung mnuih djă păn klei dưi, bhiăn hmiêt mkăp ngă djăp bruă jăk, leh anăn đăm dlao wač kơ pô hlei ôh, đăm kdloh kdlưn ôh, ƀiădah bhiăn êmit ênang, nanao bi êdah ai tiê kmah pap hŏng jih djăp mnuih. Djŏ sơnăn, wăt drei đa, mphŭn dô dih drei ăt mlŭk mgu mơh, amâo mâo gư̆t asăp, soh čhuai, jing hlŭn kơ djăp klei tluh čiăng wăt klei m’ak kdeh, hdĭp hlăm klei jhat ƀai wăt bi keh leh anăn bi êmut kơ hdăng.
Hlăk Aê Diê, Pô Bi Mtlaih drei, bi êdah ai tiê kmah pap wăt kmah khăp Ñu, Ñu mtlaih leh drei amâo djŏ kyua drei ngă leh bruă kpă ênô, ƀiădah kyua Ñu khăp pap. Ñu mtlaih drei mơ̆ng klei rao brei klei yuôm jăk kkiêng mrâo wăt mlih bi mrâo kyua mơ̆ng Êwa Kpă Myang ngă bi sĭt. Aê Diê tuh leh bŏ dlai Êwa Kpă Myang ti dlông drei, kyua mơ̆ng Khua Yêsu Krist, Pô Bi Mtlaih drei. Sơnăn, tơdah jing leh kpă ênô kyua mơ̆ng Klei yuôm jăk Khua Krist, drei dưi dưn yua klei hdĭp hlŏng lar msě si drei ăt čang hmang.
Anǎn jing Klei Blŭ Aê Diê.
KLEI MMUÑ HĐĂP KPĂ Tv 22,1-3a.3b-4.5.6 (Đ. c.1)
Jih jang: Aê Diê jing Pô mgăt atăt kâo, kâo amâo kbah mnơ̆ng ôh.
Sa čô: 1) Aê Diê Pô mgăt kâo, kâo amâo kƀah mnỡng ôh, ti kdrăn rơ̆k mtah mda, Ñu brei kâo đih mdei. Ñu atăt ba kâo ti hnoh êa êngeh, leh anăn bi mâo ai kơ kâo. Jih jang.
2) Ñu atăt ba kâo ti êlan kpă ênô kyua klei kdrưh k’hưm Ñu. Ơ Aê Diê, khă găn ƀlŭng êlam mmăt tĭt kâo amâo hŭi kơ dleh hyŭt ôh, kyua mâo Aê Diê dôk mbĭt. Hŏng giê dra kdrưh Ñu mgang kriê kâo, kâo kjăp ai ênang tiê. Jih jang
3) Aê Diê mdơ̆ng leh klei huă mnăm kơ kâo ti anăp phung roh mtam. Kŏ kâo, Ñu mmia bŏ êa ƀâo mngưi, mtĭl kpiê kâo mnăm êbeh dlai. Jih jang.
4) Ai tiê kmah pap wăt klei khăp Ñu k’up ba kâo jih klei hdĭp, leh anăn kâo mâo dôk hlăm sang Ñu grăp hruê mlan, grăp thŭn grăp ênuk. Jih jang.
DRI ÂO MNUÑ ÊLÂO KƠ KLEI MRÂO MRANG JĂK x. 1 Tx 5,18
Allêluia. Allêluia. Diih mni jăk bě hlăm djăp gru hdĭp, anăn yơh jing klei Aê Diê čiăng hlăm Khua Krist Yêsu. Allêluia.
KLEI MRÂO MRANG JĂK Lc 17, 11-19
Ya ngă amâo ƀuh ôh diñu lŏ wĭt mpŭ mni kơ Aê Diê, ƀiădah knŏng mâo sa čô tuê anei lĕ ?
Klei Mrâo Mrang jăk Khua Yêsu Krist tui si Pô Kpă Luk
Ti êlan nao kơ Yêrusalem, Khua Yêsu găn knông lăn kplah wah dua krǐng Samari hŏng Galilê. Hlăk Ñu mŭt hlăm sa boh ƀuôn, sơnăn mâo pluh čô mnuih djŏ phŭng kăp mtuôm hŏng Ñu. Digơ̆ dơ̆ng mơ̆ng kbưi leh anăn ur iêo kraih: “Ơ Khua Yêsu, akâo triah pap brei kơ hmei !” Ƀuh sơnăn, Khua Yêsu lač kơ digơ̆: “Nao mdah bě ƀô̆ mta hŏng phung pô ngă yang”. Êjai đuê̆ nao sơnăn digơ̆ mâo klei doh. Sa čô hlăm phung diñu, ƀuh pô mâo klei hlao, mtam lŏ plăk wĭt leh anăn blŭ kraih mpŭ mni kơ Aê Diê. Gơ̆ buôn asei gŭ jơ̆ng Khua Yêsu hŏng mni jăk. Gơ̆ anăn lě jing mnuih Samari. Sơnăn yơh Khua Yêsu lač: “Amâo djŏ hě jih pluh čô mâo hlao doh s’aĭ? Sơnăn ti dua păn čô adih lĕ ? Ya amâo ƀuh digơ̆ lŏ hriê mpŭ mni kơ Aê Diê, ƀiădah knŏng sa čô tuê anei lĕ ? Leh anăn Ñu lač kơ gơ̆: “Kgŭ wĭt bě ! Ai tiê klei đao ih dŏng bi hlao leh ih”.
Anǎn jing Klei Blŭ Aê Diê.