Thứ Năm Tuần XXX TN-Knăm Năm Leh Hruê Aê Diê XXX Yan Hlăm Thŭn
HRĂ DLĂNG Ep 6,10-20
Diih mă bě jih jang kdrăp khil đao mơ̆ng Aê Diê, čiăng dưi kdơ̆ng wăt dôk kjăp.
Hdruôm Hră Kpă mỡng Hră Pô kpă Pôl Bĭng kna M’ĭt kơ phung mnuih đaŏ Êphêse.
10 Ơ ayŏng adei, diih duah bě ai ktang hlăm Aê Diê wăt hlăm klei kdruh ktang Myang Ñu. 11 Djă bě jih jang kdrăp bi mblah khil đao mơ̆ng Aê Diê, čiăng dưi dôk kjăp ti anăp djăp mněč mplư mơ̆ng yang jhat. 12 Kyuadah drei kdơ̆ng blah amâo djõ hŏng mnuih ôh, biadah jing hŏng djăp klei kdruh ktang yuôm myang, hŏng phung khua kpĭ kriă lăn ala mmăt tĭt anei, hŏng phung jhat bai hlăm adu adiê. 13 Kyua anăn, diih mă bě djăp kdrăp mblah kju đao Aê Diê; sơnăn kơh, diih dưi yua jih ai ktang čiăng dưi kdơ̆ng blah wăt dôk kjăp hlăm hruê mmăt tĭt.
14 Sơnăn dôk kjăp bě: K’iêng hyuă klĭt jing klei sit, asei h’ô ao klĭt jing klei Kpă ênô, 15 jơ̆ng Čŭt klĭt juă jing ai tiê hur har hâo hưn Klei Mrâo Mrang Jăk êđăp ênang; 16 djă bě nanao khil đao jing klei đaŏ, mơ̆ng anăn diih dưi bi rai jih djăp brăm pui phung yang jhat. 17 Knhal tuč, đua bě đuôn msei jing Klei Yuôm Jăk bi mtlaih wăt djă đao mơ̆ng Êwa Myang brei, jing Asăp Aê Diê.
18 Tui hluê klei Êwa Myang atăt ktrâo, diih yua bě djăp klei kwưh wăt djăp klei ik akâo čiăng kwưh wah lač nanao. Čiăng dưi mâo msě sơnăn, diih kreh kriăng dôk krŏng bě wăt kwưh akâo brei kơ jih jang buôn sang Kpă. 19 Diih ăt kwưh akâo mơh wăt kơ kâo đa, čiăng hlăk kâo ha băng êgei blŭ, sơnăn Aê Diê brei asăp blŭ kơ kâo, čiăng kơ kâo jhòng ai hâo hưn klei myang hgăm mơ̆ng Klei Mrâo Mrang Jăk; 20 Kâo jing pô hưn Klei Mrâo Mrang Jăk anei wăt tơdah hlăk arăng dôk bi hnuh kâo hŏng săng đai. Diih kwưh akâo brei kơ kâo čiăng hlăk hưn mblang Klei Mrâo Mrang Jăk kâo bllŭ hŏng klei jhŏng ai, msě si bruă čuăn kâo bhiǎn blŭ.
Anăn jing Klei Blũ Aê Diê.
KLEI MMUÑ HĐĂP KPĂ Tv 143,1.2.9-10 (Đ. c.1a)
Jih jang: Mpŭ bi mni kơ Aê Diê jing čư̆ boh tâo brei kâo kdê.
Sa čô:
- Mpŭ bi mni kơ Aê Diê jing čư̆ boh tâo brei kâo kdê, jing Pô mtô kâo jing kahan knhăk, mjuăt kâo thâo mbruă hlăm klei blah ngă. Jih jang.
- Aê Diê jing băng găp, jing mnư̆ kđông mgang kriê, jing mnư̆ mnang răng mgang, jing Pô mtlaih bi êngiê kâo. Aê Diê jing khil brei kâo k’up kdê, Nu mgô̆ mnuih buôn sang gư̆t mpŭ klei dưi kâo. Jih jang.
- Ơ Aê Diê, akâo myơr kơ Ih sa klei mmuñ mrâo, hõng đĭng năm leh anăn brô̆ kâo pleh. Ih yơh brei kơ phung mtao kdơ̆ng dưi, mtlaih Dawit, dĭng buăl sit suôr, mơ̆ng đao gưm. Jih jang.
DRIÂO MMUN ÊLÂO KƠ KLEI MRÂO MRANG JĂK x. Lc 19,38; 2,14
Allêluia. Allêluia. Mpŭ mni kơ Mtao Prŏng, Pô hriê hŏng Aê Diê ! Êđăp ênang ti dlông adiê, leh anăn klei guh k’ang ti êngĭt adiê. Allêluia.
KLEI MRÂO MRANG JĂK Lc 13,31-35
Amâo dưi ôh Pô ba asăp Aê Diê djiê hĕ ti êngao ƀuôn prŏng Yêrusalem sơnăn.
Klei Mrâo Mrang Jăk Khua Yêsu Krist tui si Pô Kpă Luk.
31 Mâo sa hruê, ti Yêrusalem, mâo dua tlâo čô Pharisi hriê lač kơ Khua Yêsu sơnei: “Đuě bě Ih mơ̆ng anôk anei kyuadah Mtao Hêrôd dôk čiăng bi mdjiê Ih !” 32 Khua Yêsu lač kơ digỡ: “Diih nao lač bě kơ mja anăn: ‘Hruê anei wăt mgi kâo suôt yang jhat wăt bi hlao klei ruă duam, hruê tal tlâo kâo bi ruê̆.’ 33 Siăm dah, hruê anei, hruê mgi wăt aguah dih, Kâo bhiăn lŏ êbat nao kyuadah sa čô Pô ba asăp Aê Diê djiê hĕ ti êngao ƀuôn prŏng Yêrusalem sơnăn amâo dưi ôh.
34 Ơ Yêrusalem, Ơ Yêrusalem, Ih bi mdjiê phung Pô ba asăp Aê Diê wăt bhir boh tâo kơ phung mnuih mâo Aê Diê tiŏ hriê kơ Ih ! Lu blư̆ leh Kâo čiăng bi kbin hě anak aneh Ih, msě si mnŭ ana k’ŭp kƀĭn êđai ti gŭ siap, biădah diih amâo tŭ ôh. 35 Ně anei, sang diih arăng sơrăng lui măng ai diih. Biădah Kâo lač kơ diih thâo: diih amâo sơrăng lŏ adôk buh ôh Kâo truh kơ ênuk diih lač: ‘Mpŭ mni kơ Pô hriê hŏng Anăn Aê Diê !’.”
Anăn jing Klei Blũ Aê Diê.
5 MNĬT KLEI BLŬ AÊ DIÊ – 5 PHÚT CHO LỜI CHÚA