Knăm Dua Leh Hruê Aê Diê Tal XXX Yan Hlăm Thŭn
Hră dlăng (Thŭn A) Ep 5,21-33
Klei myang hgăm anei prong kdlưn êdimi. Kâo čiăng lač kơ Khua Krist wăt kơ Êpul Kpă.
Hdruôm Hră Kpă mỡng Hră Pô kpă Pôl Bĭng kna m’ĭt kơ phung mnuih đao Êphêse.
21 Ơ ayŏng adei, kyua ai tiê huǐ mpũ kơ Khua Krist, diih bi dup gut bě hdăng. 22 Pô jing Mô̆ đup gư̆t bě kơ ung msě si dup gư̆t kơ Aê Diê, 23 kyuadah ung jing kŏ kơ mô̆ ăt msě si Khua Krist jing kŏ kơ Êpul Kpă, Nu yơh jing Pô bi mtlaih Êpul Kpă, asei mlei Nu. 24 Leh anăn si Êpul Kpă đup gư̆t kơ Khua Krist, sơnăn mơh mô̆ bhiǎn dưi dup gư̆t kơ ung hlăm djăp mta klei.
25 Pô jing ung, khăp bě kơ mô̆, msě si Khua Krist khăp kơ Êpul Kpă wăt myơr asei pô kyua Êpul Kpă; 26 sơnăn, Nu bi kpă wăt lăm bi doh Êpul Kpă hŏng êa wăt hŏng asăp blŭ hdĭp hlŏng lar, 27 čiăng ti anăp Ñu, mâo sa Êpul Kpă jăk siam kdruh k’ang, amâo mâo gru čho, amâo mâo gru kčŭng amâo dah sa klei kbah, biǎdah kpă jak wăt doh ênuah. 28 At sơnăn mơh, ung bhiǎn khăp kơ mŏ msě si khăp kơ asei mlei pô. Khăp kơ mô̆ jing khăp kơ asei pô. 29 Djŏ sơnăn, ti tuôm mâo buh pô bi êmut hě kơ asei mlei pô; biǎdah, arăng rông ba wăt răng kriê kơ asei mlei pô, ăt msě si Khua Krist rông ba wăt răng kriê Êpul Kpă, 30 kyuadah drei jing kdrěč hlăm asei mlei Ñu. 31 Hdruôm Hră Kpă mâo klei čih sơnei: “Kyua anǎn yơh, êkei sơrăng lui ami ama čiăng dôk sĭt suôr hŏng mô̆ pô, leh anǎn jih dua sơrăng jing sa asei sa kdeh.” 32 Klei myang hgăm anei jing prŏng kdlưn êdimi. Kâo čiăng lač kơ Khua Krist wăt Êpul Kpă.
Anǎn Jing Klei Blŭ Aê Diê.
KLEI MMUÑ HĐĂP KPĂ Tv 127,1-2.3.4-5 (Đ. c.1a)
Jih jang: Jăk m’ak yơh hlei thâo huĭ mpŭ kơ Aê Diê.
Sa čô:
- Jăk m’ak yơh hlei thâo huĭ mpŭ kơ Aê Diê, hlei pô dôk dơ̆ng bơ̆ng huă djŏ hŏng êlan hdră Ñu. Boh tŭ jing dư̆n mơ̆ng bruă dleh kiê kngan ih mâo, ih mâo dưn yua, ih mâo klei jăk lu mbhă myun. (Jih jang)
- Mô̆ ih kriê ênăk sang pưk amâo mdê ôh hŏng ana boh kriăk ƀâo bŏ hŏng boh mnga; leh anǎn phung anak msě hŏng kbiêng ana Ôliwe dôk jŭm dar jhưng huă. (Jih jang)
- Anăn yơh jing klei jăk yâo Aê Diê pioh brei kơ mnuih thâo hŭi mpŭ kơ Ñu. Akâo kơ Aê Diê mơ̆ng Sion hriê brei kơ ih lu klei yuôm jăk. Hmăng đei hlăm jih klei hdĭp ih dưi buh Yêrsalem mâo klei mdrŏng kjăp. (Jih jang)
DRIÂO MMUÑ ÊLÂO KƠ KLEI MRÂO MRANG JĂK x. Mt 11,25
Allêluia. Allêluia. Ơ Aê Diê jing Khua lăn adiê, Kâo akâo bi mni kơ Ih, kyuadah Ih pok mdah leh klei myang hgăm Ala Mtao Adiê kơ phung đơ-điêt. Allêluia.
KLEI MRÂO MRANG JĂK Lc 13,18-21
Asăr djam bei čăt hriê kơ prŏng leh anǎn jing sa bě ana kyâo.
Klei Mrâo Mrang jăk Khua Yêsu Krist tui si Pô kpă Luk.
18 Hlăk anăn, Khua Yêsu lač kơ phung buôn sang sơnei: “Hŏng dưi bi hmô Ala Mtao Aê Diê anei lě? Hŏng Kâo dưi bi hmô Ala Mtao anăn lě? 19 Ala Mtao Aê Diê jing msě si sa asăr djam bei sa čô mă rah hlăm war djam ñu. Gơ̆ čăt hriê leh anǎn mbliư̆ jing jing ana, phung čĭm dưi ngă hruh ti adhan ñu”.
20 Khua Yêsu lŏ lač: “Hŏng Kâo dưi bi hmô Ala Mtao Aê Diê lĕ? 21 Ala Mtao Aê Diê hmô msě si kpăt kpei sa čô mniê mă lŭk hlăm tlâo hnơ̆ng kpŭng bhĭ, truh kơ hlăk jih kpŭng anăn đĭ kpei”.
Anǎn jing Klei Blŭ Aê Diê.
5 MNĬT KLEI BLŬ AÊ DIÊ – 5 PHÚT CHO LỜI CHÚA