HRUÊ 28 MLAN 10
HDƠR PÔ KPĂ SIMON WĂT PÔ KPĂ YUDA ɃĬNG KNA
FÊT MPŬ
Hră Dlăng (Thŭn A) Ep 2,19-22
Diih mâo mkŏ mjing leh ti tur gơ̆ng jing phung Bĭng Kna.
Hdruôm Hră Kpă mơ̆ng Hră Pô Kpă Pôl Ƀĭng kna m’ĭt kô phung mnuih đaŏ Êphêse.
19 Ơ ayŏng adei khăp êdi, diih amâo lŏ adôk jing mnuih êgar amâo dah mnuih jưh êjai ôh, biadah jing mnuih sa boh buôn hŏng phung mnuih jing tĭng kơ buôn sang kpă, leh anǎn jing mnuih gặp djuê Aê Diê, 20 kyua mâo mdơ̆ng leh diih ti dlông tur gơ̆ng jing phung Bĭng Kna wăt Pô ba asăp Aê Diê, bi boh tâo kiêng jing Khua Krist Yêsu yơh. 21 Hlăm Nu, jih jang hdrĭng bruă rŭ mdơ̆ng bi trim hdăng wăt kpưn đĭ jing sang kpă hlăm Aê Diê. 22 Hlăm Ñu, wăt diih đa, ăt mâo rŭ mdơ̆ng mơh mbĭt hŏng phung mnuih mkǎn jing sang Aê Diê dôk, kyua mơ̆ng Ewa Myang.
Anǎn jing Klei Blŭ Aê Diê.
KLEI MMUÑ HĐĂP KPĂ Tv 18A,2-3.4-5ab (Đ. c.5a)
Jih jang: Asăp diñu kčǎi leh tar rŏng lăn.
Sa čô:
- Adiê yăl kơ klei guh k’ang Aê Diê, adu adiê hâo hưn bruă kiê kngan Nu ngă. Hruê anei hưn mthâo kơ hruê ti anăp, mlam anei lŏ yăl kơ mlam êdei. Jih jang.
- Kăn mâo sa boh êroh lei, kăn hmư̆ ênai dhuai lei, biǎdah asăp ênai kčǎi leh tar rŏng lăn kăn hmư̆ ênai dhuai lei, leh anăn klei hưn mthâo nao truh kơ kiêng lăn. Jih jang.
DRIÂO MMUÑ ÊLÂO KƠ KLEI MRÂO MRANG JĂK
Alleluia. Alleluia: Ơ Aê Diê, hmei mmuñ bi mni kơ Ih, hmei hưn mdah Ih jing Pô-Ti-Dlông-Hĭn; Ơ Aê Diê, êpul Bĭng Kna hrăm mbĭt bi mni kơ Ih. Alleluia.
KLEI MRÂO MRANG JĂK Lc 6,12-19
Khua Yêsu ruah mă pluh dua čô leh anăn pia jing Bĭng Kna.
Klei Mrâo Mrang Jăk Khua Yêsu Krist tui si Pô Kpă Luk.
12 Hlăm jih hruê anăn, Khua Yêsu nao ti čư̆ kwưh wah lač, leh anăn Ñu krŏng leh jih sa mlam kwưh wah lač hŏng Aê Diê. 13 Truh aguah, Ñu iêô phung Bĭng kna, ruah mă pluh dua čô leh anăn pia jing Bĭng Kna. 14 Anăn jing Simôn mâo Ñu lŏ iêo jing Pêtrôs, leh anăn Andrê, ayong gơ̆; leh ti anăn Yak, Yôhan, Philip, Bartêlômi, 15 Mathiơ, Thômas, Yak anak Alphê, Simôn anăn pia hjăn Hŭl Hăl, 16 Yudas anak Yak, wăt Yudas Iskariot, mnuih bliŭ jing leh pô lhiăr.
17 Khua Yêsu trŭn mbĭt hŏng digơ̆, Ñu mjưh dôk hě ti anôk lăn dap. Ti anăn, lu lĭn dĭng kna Ñu, wăt êpul buôn sang lu lĭn mơ̆ng djăp krĭng Yudê, Yêrusalem wăt msě si mơ̆ng krĭng giăm hang ksĭ Tyr wăt Sidôn 18 hriê čiăng hmư̆ klei Ñu mblang wăt čiăng mâo bi hlao klei ruă duam. Phung mnuih mâo djăp yang čho jhat ngă hlao ăt mâo bi hlao mơh. 19 Jih jang phung lu duah hdră êlan rueh Ñu, kyuadah mâo boh ktang kbiă mơ̆ng Ñu, bi hlao jih djăp mnuih.
Anăn jing Klei Blŭ Aê Diê.
5 MNĬT KLEI BLŬ AÊ DIÊ – 5 PHÚT CHO LỜI CHÚA