Thứ Sáu Tuần 31 TN A-Knăm Êma Leh Hruê Aê Diê Tal 31 Yan Hlăm Thŭn

  • Knăm Êma Leh Hruê Aê Diê Tal 31 Yan Hlăm Thŭn

Hră dlăng (Thŭn A) — Pl 3,17-4,1

Drei hmăng guôn Pô Bi Mtlaih drei. Ñu sơrăng mlih bi mrâo asei mlei êdu awăt drei jing msě asei mlei guh k’ang Ñu.

Hdruôm Hră Kpă mỡng Hră Pô Kpă Pôl Bĭng kna m’ĭt kơ phung mnuih đaǒ Philip.

Ơ ayŏng amai adei, akâo hrăm mbĭt tui ngă bě msě si kâo, leh anăn dlăng bi nik hlăm phung hdĭp hluê si klei hmô jăk hmei pioh brei leh kơ diih. Kyuadah, msě si lu blư̆ kâo lač leh kơ diih, leh anăn ară anei kâo lŏ lač hŏng klei hia, mâo lu mnuih hdĭp bi kdơ̆ng hŏng kyâo bi kal Khua Krist: Knhal tuč diñu sơrăng luč rai. Aê Diê diñu mpŭ jing tian, leh anăn dŏ diñu mă mjing klei guh k’ang jing hě klei năng hê̆n mlâo. Diñu jing phung mnuih mĭn mă knŏng kơ djăp klei ti lăn ala. Bi drei, ƀuôn sang drei pô jing ti adiê, leh anăn drei jih ai tiê čang guôn kơ Khua Yêsu Krist mơ̆ng adiê hriê bi mtlaih drei. Ñu mâo klei ktang myang dưi lŏ bi mrâo djăp mta mnơ̆ng hdĭp, leh anăn sơrăng yua klei ktang myang anăn čiăng ƀliư̆ mlih asei mlei êdu awăt drei jing msě hŏng asei mlei guh k’ang Ñu.

Kyua anăn, Ơ ayŏng adei khăp êdimi, ai tiê kâo hdơr nanao, diih jing klei m’ak, jing klei kdrưh m’ak kâo. Ơ ayŏng adei khăp êdimima, diih bi mguôp bě hŏng Khua Yêsu čiăng hdĭp kjăp mlăp msě sơnăn.

Anăn jing Klei Blŭ Aê Diê.

KLEI MMUÑ HĐẮP KPĂ — Tv 121,1-2.3-4a.4b-5 (Đ. c.1)

Jih jang : Drei hơ̆k m’ak bi ƀru kƀĭn truh kơ sang kpă Aê Diê.

Sa čô :

  1. Hơ̆k m’ak êdi yơh hlăk hmư̆ arăng jak kâo: “Drei bi ƀru kƀĭn truh kơ sang Kpă Aê Diê !” Leh anăn mmông anei, Ơ Yêrusalem Ơi, ƀăng jang Ƀuôn Prŏng, drei mdei leh jơ̆ng. Jih jang.
  2. Yêrusalem amâo mdê ôh hŏng ƀuôn prŏng mâo mdơ̆ng jing sa klŏ prŏng kluôm ênŭm. Grăp djuê ana, djuê ana Aê Diê, bi ƀru kƀĭn ti anôk anei. Jih jang.
  3. Čiăng kơ Anăn Aê Diê, digơ̆ hrăm hưn mpŭ, msě si klei mtă leh Israel. Ăt ti anăn mơh, mdưm anôk ksiêm mkra, anôk jhưng Mtao Dawit. Jih jang.

DRIÂO MMUÑ ÊLÂO KƠ KLEI MRÃO MRANG JĂK — 1 Ga 2,5

Allêluia. Allêluia. Hlei djă pioh asăp Khua Krist mtô, hlăm ñu anăn, klei khăp Aê Diê jing sĭt ênŭm jăk leh. Allêluia.

KLEI MRÂO MRANG JĂK — Lc 16,1-8

Anak aneh ênuk anei thâo mĭn hĭn kơ anak aneh boh mngač hlăk dôk dơ̆ng hŏng hdăng mnuih.

Klei Mrâo Mrang Jăk Khua Yêsu Krist tui si Pô Kpă Luk.

Hlăk anăn, Khua Yêsu lač kơ phung ƀĭng kna sơnei: “Sa čô mnuih mdrŏng mâo sa čô mnuih kiă kriê dŏ ngăn. Arăng kčŭt kơ pô anăn bi liê dơ̆ ngăn ñu. Ñu iêô gơ̆ hriê hŏng lač: “Kâo hmư̆ ya klei arăng lač kơ ih lě ? Bruă ih kiă kriê, ih tĭng yơh hră m’ar, kyuadah mỡng ară anei ih amâo lŏ dưi ngă mnuih kiă kriê dŏ ngăn ôh ! Mnuih kiă kriê dŏ ngăn mĭn hlăm ai tiê: Ya kâo sơrăng ngă anei lě? Kyuadah khua amâo lŏ brei kâo kiă kriê dơ̆ ngăn ñu ôh. Ngă hma lě amâo ar, hiu dan lě hê̆ñ kơ arăng. Kâo thâo leh ya kâo sơrăng ngă, čiăng hlăk leh luč bruă kiă kriê dŏ ngăn, sơrăng mâo mnuih drông jum kâo hlăm sang digơ̆”.

Ñu iêô mtam grăp čô đuôm nư khua ñu hriê, leh anăn êmuh pô tal sa : “Dŭm ih đuôm nư khua kâo ?” Mnuih anăn wĭt lač: “Sa êtŭh thŭng êa prai ôliew. Ñu lač: Mă hră ih anei, dôk gŭ djăl, čih êma pluh duč. Leh anăn ñu êmuh mnuih mkăn: “Bi ih, dŭm ih đuôm nư lě? Pô anăn wĭt lač: ‘Sa êbâo kčaih mdiê. Ñu lač: Mă hră ih anei, lŏ čih sa păn êtŭh duč.

Leh anăn khua bi mni kơ mnuih kiă ngăn dŏ jhat ƀai anăn ngă hŏng klei thâo mĭn. Djŏ sơnăn, phung anak ênuk anei thâo mĭn hĭn kơ phung anak boh mngač hlăk dôk dơ̆ng hŏng phung găp diñu.

Anăn jing Klei Blŭ Aê Diê.