Knăm Pă Leh Hruê Aê Diê Tal 30 Yan Hlăm Thŭn
Hră dlăng (Thŭn A) — Pl 3, 3-8a
Kâo dlăng djăp mta klei jing hrõ hriêt s’aĭ, čiăng dưi mâo Khua Krist.
Hdruôm Hră Kpă mơ̆ng Hră Pô kpă Pôl Ƀĭng kna m’ĭt kơ phung mnuih đaŏ Philip.
Ơ ayong adei, drei yơh jing sĭt phung mnuih khăt klĭt, phung mpŭ m’ang kơ Aê Diê kyua mơ̆ng Êwa Myang Ñu, phung jhŏng krưh kdrưh m’ak kyua Khua Yêsu Krist, amâo djŏ knang hlăm kdeh asăr ôh, khă kâo anei, kâo mâo klei mta čiăng knang hlăm kdeh asăr. Tơdah arăng mkăn mâo klei mta čiăng knang hlăm kdeh asăr, sơnăn knư̆ kâo mâo klei mta hĩn: Kâo tŭ klei khăt klĭt ti hruê tal spăn, jing tĭng kơ djuê ana Israel, djuê Benjamin, jing phung Hêbrơ, anak phung Hêbrơ; gưt pioh klei bhiăn djŏ msě si sa čô Pharisi; hur har sĭt tơl ngă jhat kơ Êpul Kpă; bi hdĭp kpă ênô tui si klei bhiăn, sơnăn amâo mâo pô dưi ƀuah kâo ôh. Biădah, djăp ya klei mphŭn dô kâo yap msě si mâo klei tŭ dưn, sơnăn ară anei, kyua Khua Yêsu Krist kâo yap jing hriă hriêt. Hĭn ti anăn, kâo dlăng kơ jih jang djăp mta jing hriă-hriêt, hmô hõng klei tŭ dưn tloh ênoh, jing dưi thâo kral Yêsu Krist, Khua kâo.
Anăn jing Klei Blŭ Aê Diê.
KLEI MMUÑ HĐĂP KPĂ — Tv 104,2-3.4-5.6-7 (Đ. c.3b)
Jih jang : Ơ ai mgăt hlei phung tui duah Aê Diê, hơ̆k kdơ̆k bě.
Sa čô :
- Mmuñ bě, mmuñ mpŭ kơ Aê Diê, leh anăn bi mĭn kơ djăp bruă yuôm bhăn Ñu. Hlap bě ai kyua Anăn Kpă Aê Diê, Ơ ai mgăt hlei phung tui duah Aê Diê, hơ̆k kdơ̆k bě. Jih jang.
- Duah bě Aê Diê wăt boh ktang Ñu, amâo mdei ôh tui duah Ƀô̆ Mta Kpă Ñu. Lŏ hdơr bě djăp bruă yuôm bhăn Ñu ngă, djăp gru knăl wăt klei čuăn kñăm Ñu lač. Jih jang.
- Ơ ayŏng adei, êpul êya Abraham dĭng buăl Aê Diê, anak čô Yakôb mâo Ñu hrŏng ruah ! Aê Diê yơh jing Aê Diê drei, djăp klei Ñu čuăn kñăm jing klei bhiăn mbĭt kơ tar rŏng lăn. Jih jang.
DRIÂO MMUÑ ÊLÂO KƠ KLEI MRÃO MRANG JĂK — Mt 11, 28
Allêluia. Allêluia. Khua Myang lač: “jih jang hlei phung suǎi êmăn gui ktrŏ, hriê bě hŏng Kâo, Kâo sơrăng brei mdei bi mâo ai. Allêluia.
KLEI MRÃO MRANG JĂK — Lc 15, 1-10
Ti adiê djăp pô hlei sơrăng klei hơ̆k m’ak, kyua sa čô soh jhat hblŏk mkra kmhal.
Klei Mrâo Mrang Jăk Khua Yêsu Krist tui si Pô Kpă Luk.
Hlăk anăn, jih jang phung ring jia wăt phung soh jhat nao s’aĭ kơ Khua Yêsu čiăng hmư̆ Ñu mblang. Phung Pharisi wăt phung khua čih hră lě blŭ dŭn dŭn hdăng: “Mnuih anei drông jum phung soh jhat wăt huă ƀơ̆ng mbĭt hŏng digơ̆”. Khua Yêsu yăl yơh kơ diñu klei bi hriêng anei:
“Hlei hlăm phung diih mâo sa êtuh drei biăp biădah luč hě sa drei, amâo lui hě dua păn pluh dua păn drei mkăn hlăm kdrăn tač, čiăng nao duah bi buh biăp luč anăn? Leh buh gơ̆, mnuih anăn hỡk kdơ̆k klam ti mra. Wĭt truh kơ sang, mnuih anăn jak ƀăng găp, phung riêng gah, leh anăn lač: “M’ak bě hŏng kâo, kyuadah kâo lŏ buh leh biăp kâo, biăp luč anăn lah. Sơnăn, kâo lač kơ diih thâo: ti adiê ăt sơnăn mơh, djăp pô sơrăng hơ̆k m’ak kyua sa čô mnuih soh jhat hblŏk mkra kmhal klei soh, hĭn kơ dua păn pluh dua păn čô mnuih kpă ênô amâo guôn hblŏk mkra kmhal ôh klei soh.
“Amâo dah hlei mniê mâo pluh asăr prăk, tăm bi luč hě sa asăr, amâo čuh hě pui kđen, kih sang, suai săk dŏ dô duah mỡng buh mơh tŭ ? Leh buh, mniê anăn jak ƀăng găp, phung riêng gah, leh anăn lač: ‘M’ak bě hŏng kâo, kyuadah kâo lŏ buh leh asăr prăk kâo bi luč anăn. Ăt sơnăn mơh, kâo lač kơ diih thâo: krah phung yang adiê Aê Diê, djăp pô sơrăng hơ̆k m’ak kyua sa čô mnuih soh jhat hblŏk mkra kmhal klei soh”.
Anăn jing Klei Blŭ Aê Diê.