Knăm Dua Leh Hruê Aê Diê Tal 31 Yan Hlăm Thŭn
Hră Dlăng (Thŭn A) Pl 2,5-11
Khua Krist thơ̆ng mtrŭn leh pô. Kyua anăn yơh, Aê Diê mpŭ mđĩ leh Ñu.
Hdruôm Hră Kpă mơ̆ng Hră Pô kpă Pôl Ƀĭng kna m’ĭt kơ phung mnuih đaǒ Philip.
Ơ ayŏng adei, kplah wah hdăng diih, diih mâo bě ai tiê msě si Khua Krist Yêsu.
Khua Yêsu Krist,
dah thơ̆ng jing Aê Diê,
ƀiădah amâo mǐn bhiăn khut khat djă pioh hě
klei mtăp mđơr hŏng Aê Diê,
ƀiădah kluôm dhuôm toh hwiê leh jih klei guh k’ang,
h’ô mă asei mlei hlŭn mnă,
ƀliư̆ jing hě msě mnuih
msě si mnuih ti lăn ala.
Ñu adôk bi mtrŭn Ñu pô,
gư̆t asăp tơl kơ ư ai tŭ klei djiê,
djiê ti kyâo bi kal.
Kyua anăn yơh, Aê Diê mpŭ bi mđĭ leh Ñu,
leh anăn brei anăn iêô
prŏng kdlưn hĭn kơ jih jang anăn iêô.
Sơnăn, tơdah mrâo hmư̆ Anăn Kpă Yêsu,
ti adiê wăt ti lăn ala
wăt hlăm anôk phung djiê dôk,
djăp mta mnỡng bhiăn čuôn k’ŭt buôn k’kuh ;
leh anăn čiăng mpŭ bi hing ang Aê Diê Ama,
djăp mta mnơ̆ng hdĭp bhiăn pŏk ƀăng êgei hưn mdah sơnei:
”Khua Yêsu Krist jing Aê Diê”.
Anăn jing Klei Blŭ Aê Diê.
KLEI MMUÑ HĐĂP KPĂ Tv 21,26b-27.28-30a.30b-32 (Đ. c.26a)
Jih jang : Ơ Aê Diê, krah klei kƀĭn prŏng, kâo akâo bi mni kơ Ih.
Sa čô :
- Klei ƀuăn rơ̆ng hõng Aê Diê, kâo gư̆t pioh ênŭm ti anăp phung thâo hŭi mpŭ kơ Aê Diê. Phung ƀun pliê sơrăng ƀơ̆ng huă lap kap, mnuih duah Aê Diê sơrăng myơr klei mpŭ mni: Akâo hmưi kơ digơ̆ m’ak hdĭp hlŏng lar. Jih jang.
- Tar ƀar lăn ala lu êdi mnuih lŏ hdơr wăt lŏ wĭt kơ Aê Diê. Djăp djuê ana ti rŏng lăn buôn kkuh ti anăp Ƀô̆ Mta, kyuadah Aê Diê păn klei dưi mtao, Ñu kiă kriê ƀuôn sang. Djăp phung mdei ênang hlăm lăn, sơrăng hrăm kkuh mpŭ s’aǐ knŏng kơ hjăn Ñu, hlei phung lŏ wĭt kơ ƀruih lăn srăng hrăm buôn kkuh ti anăp Ƀô̆ Mta Ñu. Jih jang.
- Kdrěč kâo, kâo ƀuăn sơrăng hdĭp kơ Aê Diê, anak čô kâo sơrăng mpŭ ngă bruă kơ Ñu. Arăng sơrăng hưn lač Aê Diê kơ phung ênuk êdei anăp, hưn mtruh kơ djăp mnuih ênuk êdei klei kpă ênô Ñu sơnei: ”Aê Diê ngă leh msě sơnăn !” Jih jang.
DRIÂO MMUÑ ÊLÂO KƠ KLEI MRÂO MRANG JĂK Mt 11,28
Allêluia. Allêluia. Khua Myang lač : Jih jang hlei phung dôk suaĭ êmăn gui ktrŏ, hriê bě hŏng Kâo, Kâo sơrăng brei mdei bi mâo ai. Allêluia.
KLEI MRÂO MRANG JĂK Lc 14,15-24
Nao bě djăp kang êlan, mgô̆ arăng mŭt bŏ sang kơ kâo.
Klei Mrâo Mrang jăk Khua Yêsu Krist tui si Pô kpă Luk.
Hlăk anăn, sa hlăm phung dôk huă ƀơ̆ng lač kơ Khua Yêsu: “Jăk m’ak yơh hlei mguôp hlăm Ala Mtao Aê Diê!”
Khua Yêsu wĭt lač: “Sa čô mnuih mkra klei huă mnăm prŏng iêô jak leh lu mnuih. Truh mmông huă mnăm, ñu tiŏ nao dĭng buăl lač kơ phung tuê mâo iêô jak: Akâo diih hriê bě, klei huă mnăm mprăp ênŭm leh. Mmông anăn djăp mnuih hrăm dơ̆ng bi hngah. Mnuih tal sa lač: Kâo mrâo blei hma, kâo čiăng nao čuă; kâo amâo wăn ôh. Mnuih mkăn lač: Kâo mrâo blei pluh drei êmô, kâo nao dlăng lăng; kâo amâo wăn ôh. Mnuih mkăn lač: Kâo mrâo dôk mô̆, kyua anăn amâo dưi nao ôh.
Dĭng buăl anăn lŏ wĭt, lõ hưn yăl klei anăn kơ khua. Mmông anăn khua sang đĭ ai ngê̆n lač kơ dĭng buăl sơnei: Nao djăl djăp anôk êngŭm mnuih wăt êlan dơ̆ng hlăm ƀuôn prŏng, ba phung mnuih ƀun knap, êwiên êwu, bum ală ruă jơ̆ng hriê mŭt hlăm anei. Dĭng buăl lač: Ơ khua, klei ih mtă mâo ngă leh bi sĭt biădah ăt adôk mơh anôk. Khua lač kơ dĭng buăl: Nao djăp êlan klông, êlan ƀuôn, mgô̆ arăng mŭt bi ƀŏ sang kâo. Kâo lač kơ diih thâo: Phung tuê mâo iêô jak leh êlâo adih,amâo mâo ôh pô sơrăng dưi mâo mguôp hlăm klei mnăm huă hŏng kâo.
Anăn jing Klei Blŭ Aê Diê.