Knăm Tlâo Leh Hruê Aê Diê Tal 31 Yan Hlăm Thŭn
Hră dlăng (Thŭn B) — Pl 2,12-48
Diih gĭr ktĭr bě si bě ngă brei pô mâo klei bi mtlaih. Kyuadah Aê Diê yơh mtrut mjhar ai mĭn čiăng wăt msě si bruă diih ngă.
Hdruôm Hră Kpă mơ̆ng Hră Pô kpă Pôl Ƀĭng kna m’ĭt kơ phung mnuih đaǒ Philip.
Ơ ayŏng adei khăp êdimi, diih jing phung mnuih nanao gưt mpŭ amâo djŏ knŏng êjai ti anăp kâo ôh, ƀiădah boh nik ară anei, êjai kâo êkŭt,diih thâo huĭ bě wăt gĭr ktĭr si bě ngă brei pô mâo klei bi mtlaih. Kyuadah Aê Diê yơh mtrut mjhar ai mĭn čiăng wăt msě si bruă diih ngă kyua mơ̆ng klei Ñu khăp pap. Diih ngă bě djăp bruă leh anăn đăm ur krao amâo dah lõ bi kdơ̆ng ôh. Sơnăn, diih sơrăng mbliư̆ jing doh jăk, amâo mâo pô dưi ƀuah sa mta ôh, wăt sơrăng mbliư̆ jing phung anak Aê Diê ênŭm jăk, krah sa ênuk hdĭp mdê̆č luar knhŭk knhŭl. Krah ênuk hdĭp anăn,diih bhiăn mtrang mngač msě si mtŭ ti adiê, jing bi klă mngač Asăp brei klei hdĭp, čiăng kâo dưi jhŏng krưh kdrưh m’ak hlăm hruê Khua Krist lŏ hriê hlăm klei guh k’ang, kyuadah kâo amâo êran leh ôh dleh ai wăt amâo suaĭ êmăn h’aĭ mang. Ƀiă tơdah kâo bhiăn tuh hĕ êrah mguôp jing sa hŏng klei ngă yang săn myơr mâo diih mă klei đaǒ myơr kơ Aê Diê,sơnăn kâo hơ̆k m’ak wăt hrăm triêk mbha klei hơ̆k m’ak hŏng jih jang diih. Diih ăt sơnăn mơh, diih hơ̆k m’ak bě wăt hrăm triêk mbha klei hơ̆k m’ak hŏng kâo.
Anăn jing Klei Blŭ Aê Diê.
KLEI MMUÑ HĐĂP KPĂ — Tv 26,1.4.13-14 (Đ. c.1a)
Jih jang : Aê Diê jing kŏ boh mngač wăt klei yuôm jăk bi mtlaih kâo.
Sa čô :
- Aê Diê jing kŏ boh mngač wăt klei yuôm jăk bi mtlaih kâo, kơ hlei kâo lŏ huĭ ? Aê Diê jing mnư̆ mgang klei hdĭp kâo, kơ hlei kâo lŏ hyư̆t ? Jih jang.
- Sa mta klei kâo duah kâo akâo, jing dưi dôk nanao hlăm sang Khua kâo grăp hruê hlăm jih klei hdĭp, čiăng triăng dlăng Aê Diê prŏng prĭn yuôm bhăn êdimima, dlăng ƀuôn kpă kdrưh k’ang. Jih jang.
- Kâo kjăp ai đaǒ knang sơrăng mâo ƀuh klei tŭ jăk Aê Diê brei hlăm anôk pioh kơ phung hdĭp. Knang hmăng bě kơ Aê Diê, jhŏng bě ai, đĭ bě ai ! Knang hmăng bě kơ Aê Diê. Jih jang.
DRIÂO MMUÑ ÊLÂO KƠ KLEI MRÂO MRANG JĂK — 1 Pr 4,14
Allêluia. Allêluia. Tơdah arăng djik mưč diih kyua anăn Khua Krist, diih mâo sĭt klei jăk m’ak, kyuadah Êwa Myang Aê Diê dôk hlăm diih. Allêluia.
KLEI MRÂO MRANG JĂK — Lc 14.25-33
Hlei amâo lui ôh jih djăp ya mnơ̆ng pô mâo, sơnăn amâo dưi jing ƀĭng kna Kâo ôh.
Klei Mrâo Mrang Jăk Khua Yêsu Krist tui si Pô Kpă Luk.
Hlăk anăn, mâo lu êdimi mnuih nao mbĭt hŏng Khua Yêsu. Ñu wir dlăng lač kơ digơ̆:
”Hlei hriê hŏng kâo ƀiădah amâo lui ôh amĭ ama, mỗ anak,ayŏng adei, amai adei, wăt asei hdĭp pô, sơnăn amâo dưi jing ƀĭng kna kâo ôh. Hlei amâo klam ôh kyâo bi kal pô čiăng tui hluê kâo, sơnăn amâo dưi jing ƀĭng kna kâo ôh.”
Djŏ sơnăn, hlei hlăm diih čiăng ngă sa boh sang prŏng, ƀiădah tal êlâo hĭn amâo dôk gŭ tĭng lăng kơ klei bi liê, dlăng lăng dưi mơh hĕ bi leh amâo dah h’aĭ? Huĭ dah, leh mkra tur ƀiădah amâo mâo hnơ̆ng dưi bi leh, sơnăn djăp mnuih ƀuh sơnăn sơrăng mưč leh anăn lač: Ñu mphŭn mdơ̆ng leh sang, ƀiădah amâo dưi ngă bi leh ôh. Amâo dah hlei mtao nao bi blah hŏng sa čô mtao mkăn, ƀiădah tal êlâo hĭn amâo dôk gŭ mtrông lăng dưi mơh hĕ ba pluh êbâo čô kahan, nao kdơ̆ng blah hŏng arăng mâo dua pluh êbâo čô kahan? Tơdah amâo dưi ai, sơnăn hlăk pô roh adôk kƀưi, sĭt nik mtao ăt bhiăn tiŏ nao mơh mnuih hriê akâo klei hnŭk ênang. Ăt sơnăn mơh, hlei hlăm diih amâo hngah lui jih djăp ya mnơ̆ng pô mâo, sơnăn amâo dưi jing ƀĭng kna Kâo ôh.”
Anăn jing Klei Blŭ Aê Diê.