Knăm Năm Leh Hruê Aê Diê Tal 31 Yan Hlăm Thŭn
Hră dlăng (Thŭn A) — Pl 4,10-19
Hŏng Pô brei ai ktang kơ kâo, kâo dưi tŭ jih.
Hdruôm Hră Kpă mơ̆ng Hră Pô kpă Pôl Ƀĭng kna m’ĭt kơ phung mnuih đaǒ Philipe.
Ơ ayŏng adei, kyua Aê Diê, kâo hơ̆k m’ak sơnăk kyuadah knhal tuč kâo ƀuh ai tiê klei khăp diih kơ kâo sĭt suôr êdimima. Klei khăp anăn ăt mdih hdĭp, ƀiădah knŏng kbah mông găl bi mdah. Amâo djŏ kyua kbah kƀưč ôh kâo lač sơnăn, kyua kâo hriăm hdĭp leh mơ̆ng kâo pô hlăm djăp gru hdĭp. kâo hdĭp kbah kƀưč ăt tŭ mơh, leh anăn hdĭp êbeh êbiêr ăt tŭ mơh. Hlăm djăp gru hdĭp, trei amâo dah êpa, êbeh êbiêr amâo dah kbah kƀưč,kâo hriăm mjuăt leh s’ăi. Hŏng Pô brei ai ktang kơ kâo, kâo dưi tŭ gui jih. Siăm dah, diih triêk mbha leh hŏng kâo, hlăk kâo tuôm hŏng klei kbah kƀưč, sơnăn jing djŏ êdi. Diih yơh, phung mnuih ƀuôn Philip, diih thâo jing hlăm êwưng kâo mphŭn mtô mblang Klei Mrâo Mrang Jăk, hlăk kbiă mơ̆ng Masedon, amâo mâo ôh sa Êpul Kpă mkăn đru mguôp leh hlăm djăp kdrêč kâo bi liê, knŏng diih đuč; Kyua dỡng mơ̆ng hlăk kâo dôk ti Thesalonik mtam, dua tlâo blư̆ diih m’ĭt brei leh kơ kâo djăp ya dŏ kâo pioh yua. Klei kâo tui duah jing amâo djŏ mnơ̆ng đup myơr ôh, ƀiădah jing djăp ya mnơ̆ng bi mboh mnga êbeh dlai kơ diih. Kâo mâo djăp mta mnơ̆ng pioh yua, lŏ adôk êbeh êbiêr mơh đa. Kâo mâo êdimima djăp mta, dơ̆ng mơ̆ng mâo mă tŭ djăp ya dŏ diih m’ĭt kơ kâo hŏng kngan Epaphrodite. Mnơ̆ng diih brei kơ kâo anăn, amâo mdê ôh hŏng mnâo mngưi,mnơ̆ng myơr ngă yang bi m’ak Aê Diê leh anăn mâo Ñu mă tŭ. Aê Diê kâo sơrăng bi hlap ai djăp klei diih mkă čuăn hŏng klei tloh ênoh, tui si klei mdrŏng sah Ñu hlăm Khua Krist Yêsu.
Anăn jing Klei Blŭ Aê Diê.
KLEI MMUÑ HĐẮP KPĂ — Tv 111,1-2.5-6.8a & 9 (Đ. c.1a)
Jih jang : Jăk m’ak yơh mnuih hũi mpŭ kơ Aê Diê.
Sa čô :
- Jăk m’ak yơh, mnuih hũi mpŭ kơ Aê Diê, khăp wăt čiăng djăp asăp mtrŭn Aê Diê mtă brei. Ti rŏng lăn anak čô digơ̆ sơrăng ktang kjăp, djuê ana phung kpă jăk mâo Aê Diê pap hmưi brei klei jăk. Jih jang.
- Jăk m’ak yơh kơ mnuih thâo pap leh anăn brei mañ, thâo tui hluê klei djŏ čiăng prăp êmiêt bruă pô. Digơ̆ amâo sơrăng tuôm rŭng răng ôh, hlŏng lar arăng adôk hdơr mni kơ mnuih jăk ênô. Jih jang.
- Nanao kjăp ai amâo mâo klei hŭi hyư̆t ôh. Phung ƀun ƀin, digơ̆ kmah ai tiê brei klei jăk, klei kpă ênô digơ̆ adôk nao hlŏng lar, kdrưh k’hưm digơ̆ kpưn đĭ mngač bhung. Jih jang.
DRIÂO MMUÑ ÊLÂO KƠ KLEI MRÂO MRANG JĂK — 2 Cr 8,9
Allêluia. Allêluia. Khua Yêsu Krist thơ̆ng jing sah mdrŏng prŏng kdlưn, ƀiădah mbliư̆ jing hě ƀun knap, čiăng yua klei ƀun pô hŏng brei kơ diih mbliư̆ jing mdrŏng sah . Allêluia.
KLEI MRÂO MRANG JĂK — Lc 16,9-15
Tơdah diih amâo sŭk suôr hlăm bruă yua Prăk Ngăn amâo kpă, sơnăn hlei sơrăng đaǒ knang wăt jao ngăn dŏ sĭt kpă kơ diih lě ?
Klei Mrâo Mrang Jăk Khua Yêsu Krist tui si Pô Kpă Luk.
Hlăk anăn, Khua Yêsu lač kơ phung ƀĭng kna sơnei: Kâo lač kơ diih thâo: yua bě Prăk Ngăn amâo kpă čiăng ngă mah jiăng, čiăng kơ tơdah jih prăk kăk, digơ̆ sơrăng drông jum diih hlăm anôk dôk hlŏng lar. Hlei sĭt suôr hlăm bruă điêt dhiêt, sơnăn ăt sĭt suôr mơh hlăm bruă prŏng; Hlei amâo Kpă hlăm bruă điêt dhiêt,sơnăn ăt kăn Kpă lei mơh hlăm bruă prŏng. Sơnăn tơdah diih amâo sĭt suôr ôh hlăm bruă yua Prăk Kăk amâo kpă, sơnăn hlei sơrăng knang hŏng jao brei dŏ ngăn sĭt kơ diih lě ? Leh anăn tơdah diih amâo sĭt suôr hlăm bruă yua dŏ ngăn arăng, sơnăn hlei sơrăng brei kơ diih dŏ ngăn pioh kơ diih pô lě ?
Amâo mâo ôh mnuih mă bruă hlăm sang dưi ngă hě bruă kơ dua čô khua, kyua amâo dah sơrăng bi êmut kơ khua anei hŏng khăp kơ khua adih, amâo dah sơrăng mguôp suôr hŏng khua anei leh anăn mưč mač kơ khua adih. Diih amâo dưi ôh wăt jing dĭng buăl kơ Aê Diê wăt jing dĭng buăl kơ Prăk Kăk.
Phung Pharisi jia ră kơ prăk kăk, kyua anăn hmư̆ djăp klei anăn,sơnăn tlao djik kơ Khua Yêsu. Khua Yêsu lač kơ diñu: Diih jing phung mgư̆t ngă kpă ênô ti anăp mnuih, ƀiădah Aê Diê thâo jih ai tiê diih, kyuadah klei prŏng yuôm kơ mnuih lŏ jing hě klei jhat tŭt ti anăp Aê Diê.
Anăn jing Klei Blŭ Aê Diê.