Hruê Aê Diê Tal 32 Yan Hlăm Thŭn A
Hră Dlăng 1 — Kn 6,12-16
Hlei tui duah Knhuah Thâo Mĭn, sơnăn Knhuah Thâo Mĭn brei mtuôm.
Hdruôm Hră Kpă mơ̆ng Hră Knhuah Thâo Mĭn.
Knhuah Thâo Mĭn mngač kmlaĭ, wăt amâo tuôm răm rai ôh.
Hlei khăp čiăng kơ Knhuah Thâo Mĭn,
sơnăn êlưih pưih Knhuah Thâo Mĭn brei triăng dlăng.
Hlei tui duah Knhuah Thâo Mĭn,
sơnăn Knhuah Thâo Mĭn brei mtuôm.
Hlei mhao čiăng kơ Knhuah Thâo Mĭn,
sơnăn Knhuah Thâo Mĭn êbat ti anăp čiăng bi mdah brei thâo.
Hlei duah leh Knhuah Thâo Mĭn dơ̆ng mơ̆ng aguah ưm,
sơnăn amâo suăi ai dleh êmăn ôh.
Digơ̆ sơrăng ƀuh Knhuah Thâo Mĭn dôk ti ƀăng ƀhă sang mtam.
Mđing ai tiê bi mĭn kơ Knhuah Thâo Mĭn
jing dưi mâo klei mngač tač ênŭm jăk.
Hlei kyua Knhuah Thâo Mĭn hŏng mlam krŏng aguah kgŭ ưm,
sơrăng djăl dưi lơ lui djăp klei rŭng ênguôt.
Kyuadah hlei phung năng hŏng Knhuah Thâo Mĭn,
sơnăn Knhuah Thâo Mĭn hui jŭm dar duah ñu.
Ti djăp klông êlan digơ̆ nao,
Knhuah Thâo Mĭn ƀlut êdah hŏng klei mhač tač.
Grăp blĭt digơ̆ lŏ bi mĭn wĭt kơ ya mta klei,
Knhuah Thâo Mĭn hriê s’aĭ kơ digơ̆.
Anăn jing Klei Blŭ Aê Diê.
KLEI MMUÑ HĐĂP KPĂ — Tv 62,2.3-4.5-6.7-8 (Đ. c.2b)
Jih jang : Ơ Aê Diê, Ih jing Aê Diê kâo mpŭ, mngăt êwa kâo mhao čiăng leh kơ Ih.
Sa čô :
- Ơ Aê Diê, Ih jing Aê Diê kâo mpŭ, kâo tui duah Ih dỡng mỡng yang hruê mrâo ƀlě mtam. Mngăt êwa kâo mhao čiăng leh kơ Ih, asei mlei kâo anei dôk čang guôn nao, msě si lăn krô kđang, amâo mâo sa aruăt êa. Jih jang.
- Kyua anăn kâo hriê dlăng Ih hlăm sang kpă, čiăng ƀuh klei ktang myang wăt klei guh k’ang Ih. Kyuadah klei khăp Ih yuôm hĭn kơ asei hdĭp, brei ƀăng êgei kâo anei mmuñ bi mni kơ Ih. Jih jang.
- Kâo ƀuăn myơr klei mmuñ bi mni jih klei hdĭp kâo, leh anăn yơr kngan akâo kwưh hŏng anăn Ih. Ai tiê trei ƀŏ msě si arăng mrâo leh huă mnăm, ƀăng kƀuê kâo ƀŏ hŏng klei mmuiñ hơ̆k kdơ̆k. Jih jang.
- Kâo mĭn hdơr kơ Ih ti jhưng pĭt, jih sa mlam ƀlŭ bi mhač hŏng Ih. Djŏ sĭt Ih pap đru krơ̆ng leh kâo, k’ŭp ti êyui Ih, kâo m’ak hlak hơ̆k kdơ̆k. Jih jang.
BÀI ĐỌC II
Hră Dlăng 2 — 1 Tx 4,13-18
Hlei phung mdei ênang leh hlăm Khua Krist, sơrăng mâo Aê Diê ba wĭt hŏng Khua Krist.
Hdruôm Hră Kpă mỡng Hră Pô Kpă Pôl Ƀĭng kna m’ĭt kơ phung mnuih đaǒ Thêsalôlik.
Ơ ayŏng adei, kơ hlei phung djiê leh, hmei amâo čiăng ôh kơ diih hlŏng amâo thâo săng djŏ sa mta, čiăng kơ diih đăm rŭng răng msě si phung mnuih mkăn, jing phung amâo mâo klei čang hmăng. Kyua tơdah drei đaǒ sơnei Khua Yêsu djiê leh wăt lŏ dơ̆ng hdĭp leh, sơnăn ăt drei đaǒ mơh sơnei phung djiê leh hlăm Khua Yêsu, sơrăng mâo Aê Diê mă ba mbĭt hŏng Khua Yêsu. Bi mmă hŏng klei Aê Diê ƀlŭ, hmei hưn kơ diih klei anei, drei jing phung dôk hdĭp, phung mnuih lŏ adôk hlăm hruê Ñu sơrăng lŏ hriê,drei amâo sơrăng nao ôh êlâo kơ phung djiê leh. Kyuadah hlăk klei knăl mâo mtruh, hlăk asăp Khua phung yang adiê wăt ênai ki Aê Diê kwang, sơnăn Aê Diê yơh sơrăng trŭn hriê mơ̆ng adiê,leh anăn phung djiê leh hlăm Khua Krist sơrăng lŏ dơ̆ng hdĭp tal êlâo hĭn; leh anăn kơh truh kơ drei, jing phung adôk hdĭp, phung mnuih adôk, arăng sơrăng ba nao drei đĭ ti dlông ƀiut knam mbĭt hŏng digơ̆, čiăng kkuh drông Khua drei ti dlông adiê. Sơnăn, drei sơrăng dưi dôk mbĭt hŏng Khua drei nanao hlŏng lar. Sơnăn diih yua bě djăp ƀoh ƀlŭ anăn čiăng bi juh hdăng.
Anăn jing Klei Blŭ Aê Diê.
(Amâo dah klei dlăng đŭt 🙂
1 Tx 4, 13-14
Hlei phung mdei ênang leh hlăm Khua Krist, sơrăng mâo Aê Diê ba wĭt hŏng Khua Krist.
Hdruôm Hră Kpă mỡng Hră Pô Kpă Pôl Ƀĭng kna m’ĭt kơ phung mnuih đaǒ Thêsalôlik.
Ơ ayŏng adei, kơ hlei phung djiê leh, hmei amâo čiăng ôh kơ diih hlŏng amâo thâo săng djŏ sa mta, čiăng kơ diih đăm rŭng răng msě si phung mnuih mkăn, jing phung amâo mâo klei čang hmăng. Kyua tơdah drei đaǒ sơnei Khua Yêsu djiê leh wăt lŏ dỡng hdĭp leh, sơnăn ăt drei đaǒ mơh sơnei phung djiê leh hlăm Khua Yêsu, sơrăng mâo Aê Diê mă ba mbĭt hŏng Khua Yêsu.
Anăn jing Klei Blũ Aê Diê.
DRIÂO MMUÑ ÊLÂO KƠ KLEI MRÂO MRANG JĂK — Mt 24,42a.44
Allêluia. Allêluia. Diih krŏng leh anăn hmiêt mkăp bě, kyuadah mmông diih amâo mâo mĭn, mmông anăn Anak Mnuih sơrăng hriê. Allêluia.
KLEI MRÂO MRANG JĂK — Mt 25,1-13
Duh mtâo êkei, nao drông bě !
Klei Mrâo Mrang Jăk Khua Yêsu Krist tui si Pô Kpă Mathiơ.
Hruê anăn, Khua Yêsu yăl dliê kơ phung ƀĭng kna hmữ klei bi hriêng anei: Ala mtao Adiê sơrăng jing msě si phung pluh čô mniê êra, djă pui kđen nao drông mtâo êkei. Hlăm pluh čô anăn, sơnăn mâo êma čô mluk leh anăn êma čô thâo mĭn. Djŏ sơnăn, phung mniê mluk djă ba pui kđen ƀiădah amâo djă ba ôh êa pui. Bi phung mniê thâo mĭn sơnăn djă pui kđen wăt êa pui. Kyua mtâo êkei hriê êla, sơnăn diñu čiăng pĭt, leh anăn pĭt hě. Krah mlam, mâo asăp ur lač: Duh adih, mtâo êkei hriê,nao drông bě! Mmông anăn jih jang phung mniê êra anăn mdih pĭt s’aĭ, leh anăn mprăp êmiêt pui kđen. Phung mniê mluk lač kơ phung mniê thâo mĭn sơnei: Akâo diih brei kơ hmei ƀiă êa pui, kyuadah kđen hmei dỡng djiê leh! Phung mniê thâo mĭn wĭt lač: Huĭ amâo djăp ôh kơ hmei wăt kơ diih, jăk hĭn diih nao blei bě ti sang mnia. Êjai diñu nao blei, sơnăn mtâo êkei truh,leh anăn phung mniê prăp êmiêt leh dưi mâo nao hluê mtâo êkei mŭt hlăm klei mnăm huă bi kuôl. Leh anăn arăng kđăl hě ƀăng ƀhă. Knhal tuč, phung mniê adih ăt hriê iêô mơh : Ơ khua, Ơ khua ! pŏk brei ƀăng ƀhă kơ hmei đa! Biădah khua wĭt lač: Kâo lač sĭt kơ diih, kâo amâo thâo ôh hlei diih jing! Sơnăn diih dôk krŏng bě, kyuadah diih amâo thâo ôh ti hruê, ti mmông.
Anăn jing Klei Blŭ Aê Diê.