Thứ Sáu Tuần XXX TN A-Knăm Êma Leh Hruê Aê Diê Tal XXX Yan Hlăm Thŭn

Knăm Êma Leh Hruê Aê Diê Tal XXX Yan Hlăm Thŭn

HRĂ DLĂNG                 Pl 1,1-11

Pô ngă leh bi sit hlăm diih sa bruă jăk, ăt sơrăng ba mơh bruă anăn truh kơ anôk bi ruê̆ truh kơ hruê Khua Krist lŏ hriê hlăm klei guh k’ang.

Mphŭn Hră M’ĭt mỡng Pô kpă Pôl Bĭng kna kơ phung mnuih đao Philipe.

1 Hmei, Pôl wăt Timôthê, jing phung dĩng buăl Khua Krist, alum m’ĭt kơ jih djăp mnuih hlăm buôn sang Kpă bi mguôp hõng Khua Krist ti Philip, hrăm alum m’ĭt kơ phung dlăng kriê wăt phung dru bruă. 2 Akâo kơ Aê Diê jing Ama drei wăt Khua Krist brei kơ diih klei yuôm jak wăt klei êđăp ênang.

3 Kâo mni jăk kơ Aê Diê kâo, grăp blư̆ hdơr kơ diih. 4 Kâo nanao hơ̆k m’ak grăp blư̆ kwưh brei kơ jih jang diih, 5 kyuadah dơ̆ng mơ̆ng mphŭn truh kơ ară anei, diih mguôp leh ai hlăm bruă hưn mblang Klei Mrâo Mrang jăk. 6 Kâo đao sĭt sơnei: Pô mphŭn ngă leh hlăm diih sa mta bruă jăk msě sơnăn, ăt srăng ba mơh bruă anăn truh kơ klei bi ruê̆ ênŭm truh kơ hruê Khua Yêsu Krist lŏ hriê guh k’ang. 7 Kâo mâo ai tiê msě sơnăn hõng jih jang diih, anăn jing djŏ năng, kyuadah kâo djă diih hlăm ai tiê kâo. Hlăk arăng bi hnuh kâo, wăt msě si mmông kâo đru mgang wăt bi kjăp Klei Mrâo Mrang Jăk, diih mguôp hrăm s’aĭ hlăm klei yuôm jăk mâo kâo mă tŭ leh. 8 Mâo Aê Diê bi mklă kơ kâo : Jih ai tiê kâo khăp kơ diih jih jang, hŏng klei khăp Khua Yêsu Krist. 9 Klei kâo ik akâo jih ai tiê, jing brei kơ ai tiê klei khăp diih brư̆ hruê knư̆ êbeh dlai, ngă kơ diih mâo klei yuôm jăk thâo săng wăt klei knhâo buh ti anăp mta hgăm yuôm, 10 čiăng tŭ kral ti jing klei jăk hĭn. Kâo ăt akâo mơh kơ diih dưi jing doh jăk wăt amâo ngă ya mta klei năng buah ôh, êjai hlăk dôk guôn hruê Khua Krist lŏ hriê guh k’ang. 11 Sơnăn, diih sơrăng lŏ ba boh mnga êbeh dlai jing hdĭp klei hdĭp kpă ênô kyua Khua Yêsu Krist, čiăng mpŭ hing wăt bi mni kơ Aê Diê.

Anăn jing Klei blŭ Aê Diê.

KLEI MMUÑ HĐĂP KPĂ    Tv 110,1-2.3-4.5-6 (Đ. c.2a)

Jih jang: Bruă Aê Diê prŏng prĭn êdimi.

Sa čô:

  1. Kâo akâo jih ai tiê mni jăk kơ Aê Diê, hlăm êpul hgŭm mnuih yơh, ti krah klei kƀĭn prŏng. Bruă Aê Diê prŏng prĭn êdimi, mnuih khăp čiăng bě leh anăn duah thâo săng. Jih jang.
  2. Bruă knuă Aê Diê kdruh k’ang êdimima, knhuah kpă ênô Ih adôk nao truh kơ hlõng lar. Aê Diê mtă mtrŭn mpŭ hdơr djăp bruă yuôm bhăn Ñu ngă, Aê Diê jing Pô kmah khăp kmah pap. Jih jang.
  3. Hlei huĭ mpŭ kơ Ñu, Nu thiê brei mnơ̆ng bơ̆ng; Klei kuôl mguôp mkŏ mkra leh, hlŏng lar Aê Diê hdơr nanao. Boh ktang bruă Ñu ngă, Nu brei buôn sang buh klă, hlăk brei kơ digơ̆ ngăn yuôm mơ̆ng phung mnuih. Jih jang.

DRIÂO MMUN ÊLÂO KƠ KLEI MRÂO MRANG JĂK        Ga 10,27

Allêluia. Allêluia. Khua Myang lač: Biăp Kâo hmư̆ asăp Kâo; Kâo thâo kral diñu, leh anăn diñu tui hluê Kâo. Allêluia.

KLEI MRÂO MRANG JĂK          Lc 14,1-6

Hlei pô hlăm phung diih tơdah anak êkei amâo dah êmô ñu lě hlăm kbăng êa, amâo sơrăng ktŭng mă hĕ gơ̆ mtam, khă jing hruê Sabat ?

Klei Mrâo Mrang jăk Khua Yêsu Krist tui si Pô kpă Luk.

1 Sa hruê Sabat Khua Yêsu nao kơ sang sa čô khua gĭt gai êpul Pharisi čiăng huă bơ̆ng: digơ̆ gir ktuê ksiêm Ñu. 2 Leh anăn ně anei ti anăp Khua Yêsu, mâo sa čô mnuih mâo klei ruă bok asei mlei. 3 Ñu ha blŭ lač kơ phung khua păn klei bhiăn wăt kơ phung Pharisi: “Dưi mơh hĕ bi hlao hruê Sabat amâo dah h’aï ?” 4 Biădah diñu dôk ñăt. Nu rŭ mnuih ruă, bi hlao leh anăn brei gơ̆ wĭt. 5 Leh anăn Nu lač kơ digơ̆: “Hlei hlăm phung diih mâo anak êkei amâo dah êmô lě hlăm kbăng êa, amâo ktŭng mă mtam, khă kơ jing hĕ hruê Sabat dưn?” 6 Leh anăn digơ̆ amâo dưi lŏ wĭt lač kơ klei anăn ôh.

Anăn jing Klei Blŭ Aê Diê.