Knăm Tlâo Leh Hruê Aê Diê Tal 33 Yan Hlăm Thŭn
Hră Dlăng Kh 4,1-11
Kpă êdimima ! Khua Myang, Aê Diê myang êdimima, Pô mâo leh, dôk mâo leh anăn dôk hriê.
Hdruôm Hră Kpă Klei Bi Êdah mơ̆ng Pô kpă Yôhan Bĭng kna.
Kâo jing Yôhan, hlăk anăn kâo mâo sa klei bi buh. Duh sa boh băng bhǎ pok ti adiê, leh anăn asăp êlâo dih kâo hmư̆ blŭ hŏng kâo păt msě ênai ki, lač kơ kâo sơnei: “Đĭ ti anei, Kâo sơrăng ktrâo brei kơ ih buh djăp klei sơrăng bhiăn truh ti tluôn anăn.” Mtam yơh kâo dôk hlăm mngăt myang. Duh sa boh jhưng mtao dưm ti dlông adiê, leh anăn mâo Pô dôk gũ ti jhưng mtao. Pô dôk ti anăn dlăng msě si boh tâo yuôm Jaspidi leh anăn Sardinô. Jŭm jhưng mtao mâo kên rô dlăng msě si boh tâo yuôm Êmêrôd. Jŭm jhưng mtao mâo dua pluh pă boh jhưng mtao mkăn, leh anăn ti djăp jhưng mtao anăn mâo dua pluh pă čô khua mduôn; phung diñu dôk gŭ, asei h’ô ao kô̆, kŏ đua duôn mtao mah. Mơ̆ng jhưng mtao kbiă kmlă, ênai grăm ênai kmlă. Kjuh boh pui kbong, jing kjuh êwa myang mơ̆ng Aê Diê trơ̆ng mngač ti anăp jhưng mtao. Ti anăp jhưng mtao mâo mnơ̆ng msě si êa ksĭ êngeh bhang msě kǐng phalê. Ti krah jhưng mtao wăt jŭm jhưng mtao mâo pă Drei Mnơ̆ng Hdĭp, ti anăp leh anăn ti tluôn bŏ hŏng asăr ală. Mnơ̆ng Hdĭp tal sa msě si sa drei êmông gu, Mnơ̆ng Hdĭp tal dua msě si sa drei êmô mda, Mnơ̆ng Hdĭp tal tlâo mâo bô̆ mta msě mnuih, Mnơ̆ng Hdĭp tal pă msě si sa drei tlang dôk phiơr. Pă Mnỡng Hdĭp anăn, grăp drei mâo năm pŏk siap, jŭm dar leh anăn hlăm lam bŏ hŏng asăr ală. Hruê mlam diñu amâo mdei ur driâo sơnei:”Kpă ! Kpă ! Kpă Êdimima !Aê Diê, Aê Diê ktang myang êdimima,Pô mâo leh, dôk mâo, leh anăn dôk hriê !” Grăp blư̆ djăp Mnơ̆ng Hdĭp anăn mpŭ myơr klei guh k’ang, kdruh k’hưm wăt asăp mni jăk kơ Pô dôk ti jhưng mtao, Pô hdĭp truh kơ hlŏng lar, sơnăn phung dua pluh pă čô khua mduôn buôn kkuh ti anăp Pô dôk gŭ ti jhưng mtao čiăng kkuh mpŭ kơ Ñu, Pô hdĭp truh kơ hlŏng lar, leh anăn dưm đuôn mtao diñu ti anăp jhưng mtao leh anăn lač: “Ơ Aê Diê jing Aê Diê hmei,djŏ năng Ih mă tŭ klei guh k’ang, kdruh k’hưm wăt kdruh ktang, kyuadah Ih hrih mjing leh djăp mta mnơ̆ng hdĭp,leh anăn mơ̆ng klei Ih čiăngdjăp mta mnơ̆ng mâo mtam wăt mâo hrih mjing.”
Anǎn Jing Klei Blŭ Aê Diê.
KLEI MMUÑ HĐĂP KPĂ Tv 150,1-2.3-4.5-6 (Đ. Kh.4,8b)
Jih jang: Kpă ! Kpă ! Kpă Êdimima ! Khua Myang jing Aê Diê myang êdimima.
Sa čô: 1) Mpŭ mni bě kơ Aê Diê, hlăm sang kpă Ñu, mpŭ mni kơ Ñu hlăm anôk kdruh m’ang ti dlông. Mpŭ mni kơ Aê Diê kyua hdring bruă yuôm bhăn, mpŭ mni kơ Ñu bŏ kdruh ktang. Jih jang.
2) Mpŭ mni bě kơ Aê Diê, hŏng ênai ky ênai brô̆, mpŭ mni kơ Ñu, hrăm hŏng kyua pah. Mpŭ mni kơ Aê Diê, hŏng hgơr kdŏ mmuñ, mpŭ mni kơ Ñu, hluê ênai brô̆ hŏng đĭng buôt. Jih jang
3) Mpŭ mni bě kơ Aê Diê, hõng čeh yăng, mpŭ mni kơ Ñu hrăm hŏng ênai pah hgơr đrăp đrăp. Ơ jih jang phung mnuih, mpŭ mni kơ Aê Diê ! Jih jang.
DRIÂO MNUÑ ÊLÂO KƠ KLEI MRÂO MRANG JĂK x. Ga 15,16
Allêluia. Allêluia. Khua Myang lač: Kâo yơh ruah leh diih mơ̆ng krah lăn ala. Čiăng kơ diih đuê̆ nao, mâo lu boh mnga, leh anăn boh mnga diih adôk nao. Allêluia.
KLEI MRÂO MRANG JĂK Lc 19, 11-28
Ya ih amâo m’ĭt ôh prăk kâo hlăm sang prăk lĕ ?
Klei Mrâo Mrang jăk Khua Yêsu Krist tui si Pô Kpă Luk
Hlăk anăn, Khua Yêsu lõ yăl dliê dơ̆ng sa klei bi hriêng, kyua Ñu dôk giăm Yêrusalem leh anăn kyua diñu mǐn dah Ênuk Mtao Aê Diê dơ̆ng blut êdah leh. Sơnăn Ñu lač: “Mâo sa čô mnuih djuê ana mtao mtŭng đuê̆ nao kơ čar kbưi mă tŭ klei kdruh mtao, leh anăn lŏ wĭt. Ñu iêô pluh čô hlăm phung dĭng buăl ñu hriê, mbha kơ digơ̆ pluh klŏ prăk leh anăn lač kơ digơ̆: “Uê̆n bě kơ bruă duah bơ̆ng bi mâo boh mnga tơl truh kơ hruê kâo lŏ hriê”. Biădah buôn sang ñu bi êmut kơ ñu, sơnăn digơ̆ tiŏ nao sa êpul hriê ti tluôn ñu čiăng lač sơnei: ‘Hmei amâo čiăng ôh mnuih anei jing mtao hmei !’ Hlăk leh mă tŭ klei kdruh mtao, ñu lŏ wĭt. Mmông anăn ñu mtă brei iêô phung dĭng buăl mâo ñu jao brei leh klŏ prăk, čiăng dlăng dŭm boh mnga grăp čô mâo mơ̆ng klei duah bơ̆ng. Mnuih tal sa hriê lač mdah: “Ơ khua, klŏ prăk ih lŏ dưi mâo leh boh mnga pluh klŏ. Ñu lač kơ mnuih anăn: “Jăk êdi, Ơ dĭng buăl knhâo mbruă ! Kyua ih sĭt suôr leh hlăm bruă điêt dhiêt, sơnăn păn bě klei dưi kia kriê pluh boh buôn prŏng”. Mnuih tal dua hriê lač mdah: ‘Ơ khua, klŏ prăk ih lŏ dưi mâo leh boh mnga êma klŏ. Ñu ăt lač kơ mnuih anăn: “Ih ăt msě mơh, ih kia kriê bě êma boh buôn prŏng. Leh anăn mnuih tal tlâo hriê lač mdah: “Ơ khua, ně anei klŏ prăk ih, kâo đŭng leh hlăm čhiăm pioh hgăm. Kâo hŭi kơ ih, kyuadah ih jing mnuih tliêr ê’ĭt; mă dŏ amâo mâo m’ĭt, wiă dŏ amâo mâo rah. Ñu lač: “Ơ dĭng buăl alah kba ! Kâo phat tui si klei ih blŭ. Ih thâo leh kâo jing čô mnuih tliêr ê’ĭt, mă dŏ amâo mâo m’ĭt, wĭa dŏ amâo mâo rah. Ya ngă ih amâo m’ĭt prăk kâo hlăm sang pioh prăk lĕ ? Sơnăn kơh, hlăk kâo lŏ hriê, kâo mâo ktŭng mă yơh wăt ana wăt êdai gơ̆ ? Leh anăn ñu lač kơ phung dôk ti anăn: “Mă hě klŏ prăk ñu djă hlŏng brei kơ pô mâo leh pluh klŏ. Digơ̆ lač: “Ơ khua, ñu anăn mâo leh pluh klŏ lah !” Kâo lač kơ diih thâo: hlei mâo leh, sơnăn arăng lŏ mâo brei thiăm; bi hlei amâo mâo, sơnăn wăt dŏ dôk mâo ăt arăng sơrăng mă hě mơh. “Bi phung bi kdơ̆ng roh hŏng kâo adih, phung amâo čiăng kơ kâo jing mtao kia kriê diñu, sơnăn ba hriê diñu ti anei leh anăn mdjiê hě diñu ti anăp kâo”. Leh blŭ djăp klei anăn, Khua Yêsu ba êlan êlâo, nao kơ buôn prŏng Yêrusalem.
Anǎn jing Klei Blŭ Aê Diê.
5 MNĬT KLEI BLŬ AÊ DIÊ – 5 PHÚT CHO LỜI CHÚA
SUY NIỆM / KLEI BI MĬN KWƯH
“Êkŭt pô sang, mnŭ paih gŏ hdang”, hlăk pô sang nao êkŭt, dĭng buăl alah kba mphŭn “mbliư̆ mblê̆č”, amâo čiăng ngă bruă pô sang jao brei ƀiă dah lŏ ba klŏ prăk nao dơr mdăp. Lač jing čiăng răng kriê ngăn drăp pô sang hmum djut ƀiă dah klei mĭn hgăm jing čiăng bi êngiê kơ pô tlaih mơ̆ng klei dleh suăi hlăm bruă ngă kơ klŏ prăk anăn bi mâo thiăm mnga. Snăn kơh klă pô sang mâo nao êkŭt kơh thâo hlei jing mnuih alah kba, amâo mâo bruă rơ̆ng, hlei jing dĭng buăl sŭk suôr, mâo ai tiê klei rơ̆ng, mâo kŏ dlô thâo mčeh mjing, dlăng bruă pô sang jing bruă pô, leh anăn gĭr ktĭr lŏ mđrông dơ̆ng jih ai ktang pô čiăng bi mâo mnga kơ pô sang.
“Vắng chủ nhà, gà vọc niêu tôm”, khi chủ đi vắng, người tôi tớ biếng nhác bắt đầu “giở quẻ” ra, không chịu làm công việc chủ giao phó mà lại đem nén bạc đi chôn vùi. Nói là để giữ gìn tài sản của chủ nguyên vẹn nhưng thâm ý là để miễn cho mình khỏi khó nhọc trong việc làm cho nén bạc ấy sinh lợi thêm. Thế mới rõ chủ có đi vắng mới biết ai là người lười biếng, vô trách nhiệm, ai là người tôi tớ trung thành, có tinh thần trách nhiệm, có óc sáng tạo, coi việc của chủ là việc của mình, và nỗ lực phát huy tất cả năng lực của mình để sinh lợi cho chủ.
MỜI BẠN / IÊO JAK IH
Hlăm lăn ala anei, Aê Diê yơh jing pô sang nao êkŭt anăn leh jao knang kơ djuê mnuih drei kluôm lăn adiê čiăng kiă kriê. Klei bi hriêng klŏ prăk jing sa ‘klei lông dlăng’ čiăng tĭng yap ai tiê klei rơ̆ng mơ̆ng phung mnuih đăo Krist, phung ‘mnuih mă bruă’ dôk ngă bruă hlăm hdrĭng bruă rŭ mdơ̆ng Ala Mtao Aê Diê. Ih čŏng ksiêm dlăng bĕ pô dôk jing dĭng buăl mta ya? Ih dôk bi mguôp mơ̆ bruă ƀĭng kna ya hlăm krĭng đăo?
Trong thế giới này, Thiên Chúa chính là người chủ vắng nhà đó sau khi đã giao phó cho loài người chúng ta cả vũ trụ để cai quản. Dụ ngôn nén bạc là một ‘bài trắc nghiệm’ để đánh giá tinh thần trách nhiệm của các Ki-tô hữu, những ‘công nhân’ đang thi công trong công trình xây dựng Nước Chúa. Bạn hãy tự xét xem mình đang là loại tôi tớ nào? Bạn có đang tham gia công tác tông đồ nào trong giáo xứ không?
SỐNG LỜI CHÚA / HDĬP HLUÊ ASĂP AÊ DIÊ
Lŏ mđrông dơ̆ng ai tiê klei rơ̆ng hŏng Ala Mtao Aê Diê hŏng hdră hur har bi mguôp dŭm bruă ƀĭng kna mnuih đăo hlăm krĭng đăo pô.
Phát huy tinh thần trách nhiệm đối với Nước Thiên Chúa bằng cách nhiệt thành tham gia những công tác tông đồ giáo dân trong giáo xứ của mình.
CẦU NGUYỆN / KLEI KWƯH
Ơ Khua Yêsu, Ih amâo iêo ôh hmei jing dĭng buăl amâo dah hlŭn mnă ƀiă dah iêo hmei jing anak aneh leh anăn ƀĭng găp. Kâo ƀuăn hdĭp sŭk suôr leh anăn pŏk kmah čiăng rŭ mdơ̆ng Ala Mtao Ih nanao đĭ kyar truh kơ hruê Ih lŏ hriê.
Lạy Chúa Giê-su, Chúa không gọi chúng con tôi tớ hay nô lệ nhưng gọi chúng con là con cái và bạn hữu. Con nguyện sống trung thành và quảng đại để xây dựng Nước Chúa luôn tiến triển cho tới ngày Chúa lại đến.
Nguồn/Anôk Phŭn: https://giaophandanang.org/category/5-phut-loi-chua/

