HRUÊ AÊ DIÊ TAL 33 YAN HLĂM THŬN A
HRUÊ 24 MLAN 11
PÔ KPĂ ANDRÊ TRẦN DŨNG LẠC WĂT PHUNG ɃINH GĂP DJIÊ KYUA KLEI ĐAŎ
Hră Dlăng 1: 2 Mcb 7,1.20-23. 27b-29
“Ơ Mniê năng bi mni, ih m’ak ai tŭ gui wăt knang hmăng hlăm Aê Diê.”
Hdruôm Hră Kpă mơ̆ng Hră Markabê Hdruôm Tal Dua.
1 Ênuk anăn, mâo kjuh ayŏng adei arăng mă mbĭt hŏng amĭ digơ̆. Mtao Antiokia brei arăng mă giê hnuăt wăt aruăt êmô čăm digơ̆, čiăng mgô̆ digơ̆ ƀơ̆ng čĭm ŭn jing mnơ̆ng klei bhiăn Mois kăm.
20 Amĭ diñu jing mnuih jăk năng êdimima kơ drei mni m’ŭan wăt mpŭ bi hdơr. Ñu ƀuh kjuh čô anak êkei djiê hĕ hlăm sa hruê, ƀiădah ñu dê ăt kmlăn ai tŭ jih kyua klei đăo knang ñu dưm hlăm Aê Diê. 21 Ñu yua boh blŭ pô čiăng mtrŭt mjhar grăp čô-čô, ai tiê ñu bŏ hŏng klei khăp prŏng ; klei ñu blŭ khă jing klei mniê dưn, ƀiădah ktang kjăp msĕ si klei mĭn êkei ; Ñu lač kơ phung anak : 22 ’’Kâo amâo klă ôh si diih jing rup hlăm tian kâo. Amâo djŏ amĭ ôh brei kơ diih êwa ksuh wăt klei hdĭp. Kăn djŏ amĭ lei dap mdưm djăp kdrê̆č asei mlei kơ grăp čô diih. 23 Pô Hrih Mjing Djăp Mta Mnơ̆ng yơh mmuôn leh jing mnuih, leh anăn mjing leh phŭn agha djăp mta mnơ̆ng. Ñu yơh kyua traih pap, ăt sơrăng bi wĭt kơ diih ai êwa myang wăt klei hdĭp, kyuadah ară anei diih bi myuôm Klei Bhiăn Ñu hĭn kơ asei mlei pô’’.
27 Ñu lač kơ anak kluč : ’’Ơ dam, ih pap bĕ kơ amĭ : dua păn mlan dơ̆ng tian, tlâo thŭn bi mam, amĭ rông ba mtô mjuăt leh ih truh kơ dŭm anei thŭn. 28 Akâo ih dlăng bĕ kơ adiê lăn leh anăn djăp mta mnơ̆ng hlăm anăn, čiăng thâo kral Aê Diê hrih mjing leh jih jang mơ̆ng klei huŏng kduŏng, wăt mnuih ăt mâo hrih msĕ sơnăn mơh. 29 Đăm ih hŭi ôh kơ pô mdjiê mnuih anei ; ƀiădah bi mdah bĕ klei năng hŏng phung ayŏng adei ih, čiăng tŭ ư klei djiê, čiăng kơ truh hruê Aê Diê pap, Ñu sơrăng bi wĭt ih wăt ayŏng adei ih kơ kâo.’’
Anăn jing Klei Blŭ Aê Diê.
Amâo dah: Kn 3, 1-9
Aê Diê drông tŭ digơ̆ msĕ si mnơ̆ng ngă yang čuh myơr.
Hdruôm Hră Kpă mơ̆ng Hră Klei Thâo Mĭn.
1 Mngăt mnuih kpă ênô dôk hlăm kngan Aê Diê leh anăn amâo mâo klei bi kmhal knap dưi sô̆ truh ôh. 2 Phung mluk mgu dlăng kơ digơ̆ msĕ si djiê leh ; hlăk digơ̆ đuê̆ nao, diñu lač dah digơ̆ bhiăn tuôm hŏng klei amâo mbhă myun. 3 Mmông digơ̆ kbưi hŏng drei, diñu mĭn dah arăng bi rai mdjiê, ƀiădah boh sĭt gơ̆, digơ̆ dôk dưn klei êđăp ênang. 4 Mnuih lăn ala mĭn dah arăng bi kmhal digơ̆ leh, ƀiădah digơ̆ ăt bŏ dlai klei čang hmang dưi mâo hdĭp hlŏng lar amâo thâo djiê. 5 Hlăk leh mâo mkra mtô ƀơ-ƀiă, digơ̆ sơrăng mâo dưn klei pah mưn jăk prŏng prĭn. Djŏ sơnăn, Aê Diê bi lông dlăng leh digơ̆ leh anăn ƀuh digơ̆ năng hŏng Ñu. 6 Ñu hrŏng bi doh leh digơ̆ msĕ si arăng lông mah hlăm pui, leh anăn drông tŭ digơ̆ msĕ si mnơ̆ng ngă yang čuh myơr. 7 Hlăk truh mmông mâo Aê Diê čuă čhưn, Digơ̆ sơrăng trơ̆ng mngač msĕ si êlah pui hlia ƀơ̆ng mbô. 8 Digơ̆ sơrăng phat ksiêm lu ƀuôn sang, leh anăn kiă kriê lu čar kwar. Leh anăn Aê Diê sơrăng jing Mtao digơ̆ truh hlŏng lar. 9 Hlei phung knang hmăng hlăm Ñu, sơrăng săng klei sĭt; hlei phung sĭt suôr, sơrăng mâo Ñu khăp pap leh anăn brei dôk giăm Ñu, kyuadah Ñu brei klei yuôm jăk wăt dlăng pap hlei phung Ñu hrŏng ruah.
Anăn jing Kklei Blŭ Aê Diê.
KLEI MMUÑ HĐĂP KPĂ Tv 125.1-2ab.2cđ-3.4-5.6 (Đ. c.5)
Jih jang : Hlei nao rah hŏng êa ală mta, sơrăng puôt wĭa hlăm klei hơ̆k kdơ̆k.
Sa čô : 1) Hlăk Aê Diê atăt mnă Sion lŏ wĭt, drei mĭn dah pô msĕ si dôk êpei. Ti ƀăng êgei kwang bŏ hŏng klei blŭ tlâo hơ̆k kdơ̆k,ti kƀông đrăp-đrăp klei mmuñ hơ̆k. Jih jang.
2) Hlăk anăn hlăm ƀuôn sang tuê, arăng lač hdăng: ‘’bruă Aê Diê ngă kơ digơ̆ prŏng prĭn êdi!’’ Bruă Aê Diê ngă kơ drei, hƀôih prŏng êdi ! Drei ƀuh pô bŏ dlai klei hơ̆k m’ak. Jih jang.
3) Ơ Aê Diê, akâo atăt brei mnă hmei wĭt, msĕ hjan lĕ đoh hlăm hnoh êa khuôt ti krĭng dhŭng. Hlei nao rah hŏng êa ală mta, yan puôt wĭa kơ êdei bŏ hŏng klei hơ̆k. Jih jang.
4) Digơ̆ đuê̆ nao, êbat hŏng êa ală mta, ba asăr mjeh nao rah; hlăk lŏ wĭt, wĭt hŏng klei ur hơ̆k, mra ênông klam mdiê ksă. Jih jang.
Hră Dlăng 2: Rm 8,31-39
Khă klei djiê amâo dah klei hdĭp ăt kăn dưi bi ktlah lei drei mơ̆ng klei khăp Aê Diê.
Hdruôm Hră Kpă mơ̆ng Hră Pô Kpă Pôl Bĩng kna m’ĭt kơ phung mnuih đao Rôm.
31b ayong adei, mâo Aê Diê đru dŏng drei, hlei adôk lò dưi bi kdơ̆ng hŏng drei lĕ ? 32 Tơl kơ Anak pô pĭn Nu ăt kăn h’ưi lei, biadah jao brei leh kyua jih jang drei. Dah brei leh Anak Nu anăn, ai leh Aê Diê amâo brei hĕ kơ jih jang drei lě ? 33 Hlei sơrăng mplě klei soh kơ phung mnuih Aê Diê ruah leh ? Yă Aê Diê, Pô ngă mjing brei klei kpă ênô deh ? 34 Hlei sơrăng mplě kđi kơ digơ̆ lĕ ? Yă Khua Krist hě, Pô djiê leh, hĭn ti anăn, lŏ dơ̆ng hdĭp leh, leh anăn dôk tĭng hnuă Aê Diê čiăng kwuh brei kơ drei ?
35 Hlei dui bi ktlah hě drei mỡng klei khăp Khua Krist lĕ ? Djŏ mơh hĕ jing klei dleh dlan, knap mñai, rưč êpa, hŭi hyư̆t, arăng ngă jhat, kju dao ? 36 Msě si mâo klei čih : Kyua Nu yơh mâo grăp hruê arăng mdjiê hmei, mâo yap msě si êpul biăp arăng pioh čuh bơ̆ng.
37 Biadah hlăm djăp klei bi lông dlăng anǎn, drei kdỡng dưi jih kyua mơ̆ng Pô khăp leh kơ drei.
38 Djo sơnăn, Kão đaŏ sĭt sơnei: Khă jing hě klei djiê amâo dah klei hdip, yang adiê amâo dah boh ktang yang jhat, ară anei amâo dah êdei anăp, amâo dah djăp ai ktang mkăn, 39 adiê dlông amâo dah băng êlam amâo dah djăp mta mnơ̆ng hrih mkăn, amâo mâo ya mta dưi bi ktlah drei mơ̆ng klei khăp Aê Diê bi êdah hlăm Yêsu Krist, Khua drei.
Anǎn jing Klei Blŭ Aê Diê.
DRIÂO MMUN ÊLÂO KƠ KLEI MRÂO MRANG JĂK Mt 6, 10
Alleluia. Alleluia.
Jăk m’ak yơh kơ phung arăng ngă jhat kyua hdĭp kpă ênô, kyuadah Ala Mtao Aê Diê jing kơ diñu. Alleluia.
KLEI MRÂO MRANG JĂK Lc 9, 23-26
Hlei jhong bi luč asei hdĭp ñu kyua Kâo, sơnăn sơrăng mtlaih asei hdĭp anăn.
Klei Mrâo Mrang Jăk Khua Krist tui si Pô Kpă Luk.
23 Hlăk anăn, Khua Yêsu lač kơ jih djăp mnuih sơnei: “Hlei čiăng tui hluê Kâo, bhiǎn hngah lui ňu pô, klam kyâo bi kal ñu grăp hruê hŏng tui hluê. 24 Djo sơnăn, hlei čiăng mtlaih asei hdĭp pô, sơnăn sơrăng luč, bi hlei hlŭt asei hdĭp pô kyua Kâo, sơnăn sơrăng dưi mtlaih asei hdĭp anǎn. 25 Kyuadah hlei mâo jih lăn ala biǎdah bi luč hě asei pô amâo dah hriêt asei, sơnǎn ya mâo klei tŭ dưn lĕ ? 26 Hlei pô hêñ kyua Kâo wăt djăp klei Kâo blŭ, sơnăn Anak Mnuih ăt sơrăng hêñ mơh kyua pô anăn, hlăk Ñu trŭn hriê hlăm klei guh k’ang ñu, guh k’ang Aê Diê Ama, wăt phung kpă yang adiê.
Anǎn jing Klei Blŭ Aê Diê.
Amâo dah: Ga 17, 11b-19
Lăn ala bi êmut leh kơ digơ̆
Klei Mrâo Mrang Jăk Khua Krist tui si Pô Kpă Yôhan.
11b Hlăk anăn, Khua Yêsu angưi ală kơ adiê leh anǎn kwưh wah lač sơnei: ” Ama kpă êdimima, akâo kia kriê phung băng kna hlăm anǎn Ih mâo Ih brei leh kơ Kâo, čiăng kơ diňu jing sa msě si drei. 12 Hlăk adôk hŏng diñu, Kâo kiă kriê leh diñu hlăm Anăn kpă Ih mâo Ih brei leh kơ Kâo. Kâo kiǎ mgang leh diñu, leh anǎn amâo mâo ôh sa čô pô hlei hlăm phung diñu bhiăn luč rai hě, knŏng hjǎn anak klei luč, čiăng bi sĭt asăp Hdruôm Hră Kpă. 13 Mmông anei, Kâo nao kơ lh, leh anăn Kâo lač djăp klei anăn hlăk adôk dôk ti lăn ala, čiăng kơ diñu dưi mâo dưn kluôm ênŭm klei m’ak Kâo. 14 Kâo lŏ mtruh leh kơ diñu asăp blŭ Ih, leh anăn lăn ala bi êmut lĕ kơ diñu, kyua diñu amâo jing tĭng kơ lăn ala ôh, wăt msě si Kâo anei amâo jing ôh tĭng kơ lăn ala. 15 Kâo amâo akâo kơ lh mă hĕ diñu tlaih mơ̆ng lăn ala ôh, biadah akâo kơ lh kriê mgang diñu mơ̆ng yang jhat. 16 Diñu amâo jing ôh tĭng kơ lăn ala, wăt msě si Kâo anei amâo jing ôh tĭng kơ lăn ala.” Akâo Ih mă klei sĭt čiăng myơr bi kpă diñu. Asăp blŭ lh jing klei sĭt. Msě si Ih tiŏ hriê leh kâo ti lăn ala, sơnăn kâo ăt tiŏ nao mơh diňu hriê ti lăn ala. Kyua diñu, Kâo akâo myơr bi kpă kâo pô, čiăng kyua klei sĭt, diñu ăt mâo myơr bi kpă mơh.
Anăn jing Klei Blŭ Aê Diê.