KNĂM SA LEH HRUÊ AÊ DIÊ TAL 32 YAN HLĂM THŬN
CUNG HIẾN THÁNH ĐƯỜNG LATERANO
MPŬ MYƠR SANG KPĂ LATÊRANÔ
Hră Dlăng Ed 47,1-2.8-9.12
Kâo ƀuh leh hnoh êa mơ̆ng ƀăng bhǎ Sang Mpŭ đoh ƀlě, leh anǎn jih jang hlei mâo êa anăn rao bi kpă dưi dưn s’ǎi klei yuôm jăk klei bi mtlaih..
Hdruôm Hră Kpă mỡng Hră Esêkiêl Pô ba asăp Aê Diê.
Mmông anăn, yang adiê atăt kâo lŏ wĭt phă ƀăng bhă Sang Mpŭ, leh anǎn ně anei: mâo êa bluh hriê mơ̆ng gŭ ƀăng bhǎ Sang Mpŭ leh anăn đoh nao phǎ ngŏ, kyuadah anăp ƀỗ Sang Mpŭ dai tĭng kơ ngŏ. Ea mỡng gŭ tĭng nah hnuă Sang Mpŭ đoh nao phǎ dhŭng knưl ngă yang. Pô anăn ba kâo kbiă hluê ƀăng jang nah dưr leh anǎn atăt kâo nao jŭm dar hluê êlan ti êngao, truh ti ƀăng jang tĭng kơ êngao anăp phă ngŏ, leh anăn ně anei: êa mơ̆ng nah hnuă doh hriê.
Pô anǎn lač kơ kâo : “Ea anei đoh nao phǎ krĭng lăn phă ngŏ, trŭn krĭng Araba, leh anăn đoh hluh kơ êa ksi Hrah wăt ngă kơ êa ksĩ mbliư̆ jing jăk. Tăp anôk êa krông đoh nao sơnăn djăp mnơ̆ng ƀra- ƀra ti anăn sơrăng dưi mâo hdĭp. Sơrăng mâo lu êdimi kěň kan, kyuadah tăp anôk êa anei đoh nao, sơnăn ñu bi hlao; tăp anôk êa krông anei đoh nao, sơnăn ti anăn mâo klei hdĭp. Dua nah hang krông sơrăng čăt djăp ana boh kroh, hla ñu amâo tuôm dliu, boh amâo tuôm jih : grăp mlan djăp ana boh anăn sơrăng bi mboh mrão kyua mâo êa đoh hriê mỡng Sang Mpŭ. Boh yua mjing mnơ̆ng ƀơ̆ng bi hla lě pioh ngă êa drao”.
Anǎn jing Klei Blŭ Aê Diê.
KLEI MMUÑ HĐĂP KPĂ Tv 45,2-3.5-6.8-9 (Đ. c. 5)
Jih jang: Sa hnoh krông đoh ktlah lu kniêr ba klei hỡk kơ Ƀuôn Prŏng Aê Diê : anei yơh jing sang Kpă Pô Ti Dlông Hĭn.
Sa čô: 1) Aê Diê jing anôk drei kđap, jing boh ktang kơ drei. Nanao Ñu hmiêt mkăp đru hlăk drei tuôm hŏng klei dleh. Sơnăn khă kơ lăn ala mbliữ mlih, čư̆ kbuôn klưh dlưh hě hlăm êa ksĭ êlam. Jih jang.
2) Sa hnoh krông đoh ktlah lu kniêr ba klei hơ̆k kơ ƀuôn prŏng kpă Aê Diê : anei yơh jing sang kpă Pô Ti Dlông Hĭn. ƀuôn prŏng amâo kpữ mgei ôh; mỡng yang hruê blě, Aê Diê pap dŏng đru. Jih jang
3) Aê Diê yơh Khua lăn adiê dôk hŏng drei nanao, Aê Diê Yakob jing Ƀuôn Prŏng răng mgang drei. Hriê wě dlăng hdring bruă Aê Diê, Pô rah klei hŭi mdŭi ti rŏng lăn. Ñu bi mjuh klei blah ngă ti tar răng lăn ala. Jih jang.
Hră dlăng 2 1Cr 3,9c-11.16-17
Diih jing Sang Mpŭ kơ Aê Diê.
Hdruôm Hră Kpă mơ̆ng Hră Tal sa Pô Kpă Pôl Ƀĭng kna m’ĭt kơ phung mnuih đăo Kôrintô.
Ơ ayŏng adei, diih jing sang Aê Diê mdơ̆ng.
Tui si klei yuôm jăk Aê Diê brei leh kơ kâo, kâo ngă tur sang msě si sa čô pô knhâo mbruă, bi mnuih mkǎn diñu mdỡng mđĩ ti tur anăn. Ƀiădah grăp čô răng mă kơ klei pô mdơ̆ng mđĭ. Kyuadah amâo mâo ôh pô dưi ngă tur mkăn êngao kơ tur mprăp ngă leh jing Khua Yêsu Krist.
Diih amâo thâo hĕ kơ diih jing Sang Mpŭ kơ Aê Diê, leh anăn Aê Diê, leh anǎn Êwa Kpă Myang Aê Diê dôk hlăm diih ? Sơnăn hlei bi rai Sang Mpŭ Aê Diê, sơnăn Aê Diê sơrăng bi rai pô anǎn. Kyuadah Sang Mpŭ Aê Diê jing anôk kpă, leh anăn Sang Mpŭ anǎn jing diih yơh.
Anǎn jing Klei Blŭ Aê Diê.
DRI ÂO MNUÑ ÊLÂO KƠ KLEI MRÂO MRANG JĂK x. 2 Sb 7,16
Allêluia. Allêluia. Khua Myang lač: Kâo ruah wăt bi kpă leh sang anei, čiăng kơ Anăn Kâo dôk ti anei truh kơ hlŏng lar. Allêluia.
KLEI MRÂO MRANG JĂK Ga 2, 13-22
Sang Mpŭ Khua Yêsu čiăng lač jing asei mlei Ñu pô.
Klei Mrâo Mrang Jăk Khua Yêsu Krist tui si Pô Kpă Yôhan.
Dơ̆ng truh leh hruê fêt Klei Găn phung Israel, Khua Yêsu nao kơ ƀuôn prŏng Yêrusalem. Nu buh hlăm Sang Mpŭ mâo phung čhĭ biăp, êmô, čim ktrâo, wăt phung mnuih dôk gŭ mlih prăk. Mtam mă klei kuǐ mjing giê hnuăt čiăng suôt jih jang phung digơ̆ hŏng biăp êmô kbiă mơ̆ng Sang Mpŭ; bi prăk phung mnuih bi mlih, Ñu srai ksăk ksaĭ, leh anǎn klữ hĕ jhưng mdhô̆ digơ̆. Ñu lač kơ phung chỉ čĭm ktrâo: “Ba jih jang djăp dŏ anei kbiă m̆ng anei, đăm mjing ôh sang Ama kâo jing anôk čhĭ mnia”. Phung ƀĭng kna Ñu lŏ hdơr klei čih leh hlăm Hdruôm Hră Kpă: Kyua klei jih ai tiê uê̆ñ kơ bruă sang Aê Diê, mâo kâo anei sơrăng bhiǎn hriă asei.
Phung Israel êmuh Khua Yêsu: “Ti klei knăl yuôm bhăn Ih yua bi êdah kơ hmei ƀuh jing Ih mâo klei dưi ngă msẽ sơnăn ?” Khua Yêsu wit lač: “Diih bi rai yơh Sang Mpŭ anei; hlăm tlâo hruê, kâo sơrăng lŏ mdỡng ñu”. Phung Israel lač: “Sang Mpŭ anei pă pluh năm thŭn kơh mâo leh mdỡng, ƀiădah si ih dưi lŏ mdơ̆ng hlăm tlâo hruê lĕ ?” Ƀiădah Sang Mpũ Khua Yêsu čiăng lač ti anei jing asei mlei Ñu yơh. Sơnăn, hlăk Ñu kgŭ lŏ hdĭp mơ̆ng anôk klei djiê, phung ƀĭng kna lŏ hdơr yơh klei Ñu lač leh anăn, diñu đăo kơ Hdruôm Hră Kpă wăt asăp Khua Yêsu blŭ leh.
Anǎn jing Klei Blŭ Aê Diê.