HRUÊ 10 MLAN 11
PÔ KPĂ LÊÔ, AMA PRŎNG, TIẾN SĨ HỘI THÁNH, FÊT HDƠR
Thánh Lêô Cả, giáo hoàng, tiến sĩ Hội Thánh. Lễ nhớ.
Hră Dlăng Tt 2, 1-8. 11-14
Bhiăn hdĭp knhuah jăk kpă, kyuadah drei hmăng guôn hruê yuôm jăk ăt nanao dôk guôn, hruê Khua Krist Yêsu jing Aê Diê wăt jing Pô Bi Mtlaih drei, blut êdah guh k’ang.
Hdruôm Hră Kpă mỡng Hră Pô Kpă Pôl Ƀĭng kna m’ĭt kơ Titô .
Ơ Titô khăp êdimi, kdrê̆č ih, mtô bě djăp ya klei djŏ guôp hŏng êlan klei đaŏ jăk ênuah. Mtă mtăn bě kơ phung khua mduôn bhiăn bi hnơ̆ng, jăk ênô, mkă hnỡng, ktang kjăp hlăm klei đaŏ, klei khăp wăt knhuah hñăn ai. Phung mniê mduôn ăt msě mơh, bhiăn dôk dơ̆ng si bě bi năng jing mnuih kpă, amâo blŭ jhat, amâo kpiê ruă čuă êba, ƀiădah thâo mtô lač klei ênuah ênô.
Sơnăn, digỡ sơrăng mtô kơ mô̆ adôk hlăk ai thâo khăp kơ ung, khăp kơ anak, thâo hdĭp mkă hnơ̆ng, doh ênuah, kriê uê̆ñ bruă pŭk sang, gư̆t ngă bruă kơ ung, čiăng asăp Aê Diê blŭ amâo mâo arăng bi jhat. Diih ăt mtă mtăn mơh kơ phung hlăk ai bhiăn pioh klei mkă hnơng hlăm djăp mta. Ih yơh hmô bě klei jăk kơ djăp knhuah kpă ênuah. Hlăk ih mtô mblang sơnăn êlan klei đao bhiăn doh jăk, knhuah dôk dỡng bhiăn ênô ênăng, boh blŭ bhiăn jăk ênô, amâo mâo pô dưi ƀuah jhă, ngă kơ pô roh bhiăn hê̆ñ kdê̆ň, kyua amâo dưi blŭ jhat kơ drei ya mta klei.
Djŏ sơnăn, klei yuôm jăk mơ̆ng Aê Diê mâo bi êdah leh, ba hriê klei yuôm jăk bi mtlaih kơ jih jang mnuih. Klei yuôm jăk anăn mtô drei dưi lui klei hdĭp jhat wăt djăp klei tluh čiăng lăn ala, hŏng hdĭp bi hnỡng, kpă ênô wăt khuah kpă jăk ti lăn ala anei. Mâo hĕ msě sơnăn, jing kyua drei čang guôn hruê jăk m’ak ăt nanao hmăng guôn, hruê Khua Krist Yêsu jing Aê Diê pô ti dlông hĭn wăt jing Pô Bi Mtlaih drei, blut êdah klei guh k’ang. Kyua drei, Ñu thơ̆ng myơr leh Nu pô čiăng bi mtlaih drei brei tlaih mơ̆ng djăp klei amâo kpă ênô, wăt čiăng hrŏng bi doh drei, ngă kơ drei jing phung ƀuôn sang Nu hjǎn mdê, sa ƀuôn sang hur har ngă bruă jăk.
Anǎn jing Klei Blŭ Aê Diê.
KLEI MMUÑ HĐĂP KPĂ Tv 36,3-4.18. & 23.27 & 29 (Đ. c.39a)
Jih jang: Mnuih kpă ênô mâo Aê Diê pap bi mtlaih.
Sa čô: 1) Đǎo knang yơh hlăm Aê Diê leh anăn ngă klei jăk, sơnăn sơrăng dưi dôk hlăm lăn čar wăt hdĭp jăk ênang. Mă bě Aê Diê mjing klei hơ̆k m’ak kơ ih, Ñu sơrăng brei djăp klei bi hlap ai. Jih jang.
2) Aê Diê dlăng ba klei hdĭp mnuih ênŭm jăk, ngăn yuôm digơ̆ adôk nanao truh kơ hlŏng lar. Aê Diê đru mnuih čhuang êbat hŏng klei kjăp, khăp kơ êlan hdră digỡ êbat hluê. Jih jang
3) Ngă bě klei jăk bi kbui klei jhat, ih sơrăng mâo sa anôk dôk hlŏng lar. Bi mnuih kpă ênô mâo lăn buăn mjing ngăn dưn yuôm, wăt dôk ti anăn nanao hlong lar. Jih jang.
DRIÂO MNUÑ ÊLÂO KƠ KLEI MRÂO MRANG JĂK Ga 14,23
Allêluia. Allêluia. Hlei khăp kơ Kâo, sơnăn sơrăng djă pioh Klei Kâo blŭ. Ama Kâo sơrăng khăp kơ ñu anăn, Ama Kâo wăt Kâo sơrăng hriê dôk hŏng ñu anăn. Allêluia.
KLEI MRÂO MRANG JĂK Lc 17,7-10
Hmei jing phung dĭng buăl amâo mâo tŭ, hmei knong ngă leh bruă čuăn đuč.
Klei Mrâo Mrang jăk Khua Yêsu Krist tui si Pô Kpă Mathiơ.
Hlăk anăn, Khua Yêsu lač kơ phung Ƀing Kna sơnei: “Hlei hlăm diih mâo dĭng buăl nao kai hma amâo dah nao kiă biăp, ƀiădah hlăk ñu wit mơ̆ng hma, lač hĕ kơ gơ̆: ‘Mŭt bě djǎl hlŏng huă, ya amâo lač: ‘Mdơ̆ng bě êsei djam brei kâo huă, h’yuă hdrăng k’iêng jhŏk brei êsei djam kơ kâo hua ƀơ̆ng bi leh êlâo, leh anăn kơh ih huă ƀỡng êdei hŏ!’? Yă pô sang lŏ hdơr hě knga kơ dĭng buăl kyua gơ̆ ngă leh hluê si klei ñu mtrŭn deh ? Kơ diih ăt sơnăn mơh: hlăk ngă leh jih jang djăp ya dŏ hluê si klei mtrŭn bhiăn ngă, sơnăn lač bě: Hmei jing phung dĭng buăl amâo tŭ, hmei knŏng ngă leh bruă čuăn đuč”.
Anǎn jing Klei Blŭ Aê Diê.