Hruê 02 Mlan 11
Fêt Kwưh Brei Kơ Phung Mngăt Djiê Leh
Klei Ngă Yang I
HRĂ DLĂNG 1 G 19,1.23-27
Kâo thâo Pô dŏng đru kâo ăt dôk hdĭp.
Hdruôm Hră Kpă mơ̆ng Hra Yôp.
1 Hlăk anăn, Yôp ha blŭ lač :
23 “Hƀôih djăp klei kâo blŭ anei, hmăng đei mâo mnuih lŏ čih hě,
hmăng đei mâo mnuih čih hlăm hdruôm hră,
24 mâo mnuih đa phat hŏng boh tâo, đa tuh hŏng kmrak,
đa ktur ti boh tâo truh kơ hlŏng lar!
25 Kâo thâo Pô dŏng mgang kâo ăt dôk hdĭp mơh,
leh anăn knhal tuč, Ñu sơrăng dôk ti rŏng lăn.
26 Hlăk leh klĭt kliêng kâo anei arăng bi rai,
sơnăn hŏng asei mlei, kâo sơrăng mâo triăng dlăng Aê Diê.
27a Kâo anei yơh sơrăng mâo triăng dlăng Ñu,
Pô kâo dlăng buh amâo djŏ mnuih êgar ôh”.
Anăn jing Klei Blŭ Aê Diê.
KLEI MMUÑ HĐĂP KPĂ Tv 26,1.4.7 & 8b & 9a.13-14 (Đ. c. 13)
Jih jang : Kâo kjăp ai đăo knang sơrăng dưi buh klei tŭ jăk Aê Diê brei hlăm anôk lăn pioh kơ phung hdĭp.
Sa čô :
- Aê Diê jing klei mngač, jing Pô bi mtlaih, kơ hlei kâo lŏ huĭ ? Aê Diê jing mnư̆ mgang klei hdĭp kâo, kơ hlei kâo lŏ huĭ ? Jih jang.
- Mâo sa mta kâo duah, kâo akâo, jing dưi dôk nanao hlăm sang Khua kâo grăp hruê-hruê jih klei hdĭp kâo, čiăng triăng dlăng Aê Diê jăk êdimima, dlăng buôn kpă kdruh k’ang. Jih jang.
- Ơ Aê Diê, akâo Ih hmư̆ brei klei kâo akâo kwưh, akâo pap lŏ wit lač brei. Bi mǐn kơ Ih, kâo lač hjăn : Ơ Aê Diê, kâo duah Bô̆ Mta Kpă Ih. Akâo Ih đăm mđăp bô̆ mta ôh. Jih jang.
- Kâo kjăp ai đaŏ knang sơrăng dưi buh klei yuôm jăk Aê Diê brei hlăm anôk lăn pioh kơ phung hdĭp. Knang hmăng bě kơ Aê Diê, jhŏng bě ai, kmlăn bě ai! Knang hmăng bě kơ Aê Diê. Jih jang.
HRĂ DLĂNG 2 Rm 5,5-11
Drei dưi mâo jing leh kpă ênô kyua mơ̆ng Êrah Khua Krist tuh leh, sĭt nik sơrăng mâo Ñu mtlaih mơ̆ng klei ngê̆ñAê Diê.
Hdruôm Hră Kpă mơ̆ng Hră Pô Kpă Pôl Bĭng kna m’ĭt kơ phung mnuih đaŏ Rôm.
5 Ơ ayŏng adei, drei amâo sơrăng luč klei čang hmang ôh, kyuadah Aê Diê tuh leh klei khăp Ñu hlăm ai tiê drei, mơ̆ng Êwa Kpă Myang Ñu brei leh kơ drei. 6 Djŏ sơnăn, hlăk drei amâo mâo ai dưi ngă sa mta kyua adôk jing phung mnuih amâo mâo đaŏ, sơnăn djŏ hluê si klei kčah, Khua Krist djiê leh kyua drei. 7 Păt msě si amâo mâo ôh pô djiê kyua mnuih kpă ênô, thâo bě mâo pô jhŏng djiê hě kyua sa čô mnuih jăk ênuah. 8 Biădah Khua Krist dê djiê leh kyua drei, hlăk drei adôk jing phung mnuih soh jhat mtam; anăn yơh jing klei knăm knăl Aê Diê khăp kơ drei. 9 Hĭn jai ară anei drei dưi jing leh kpă ênô kyua êrah Khua Krist tuh leh, sĭt nik drei sơrăng mâo Ñu mtlaih brei mơ̆ng klei Aê Diê ngê̆n. 10 Djŏ sĭt, tơdah drei adôk bi kdơ̆ng hŏng Aê Diê mtam, Aê Diê lui leh Anak Ñu bhiăn djiê čiăng brei kơ drei dưi bi grăng hŏng Ñu, hĭn jai ară anei hĭn drei mâo leh klei bi grăng, sit nik drei sơrăng mâo bi mtlaih mơ̆ng klei hdĭp Anak Ñu anăn. 11 Biădah amâo djŏ knong sơnăn ôh, drei adôk mâo Aê Diê jing klei kruh ai, kyua Yêsu Krist, Khua drei, Pô ară anei bi grăng leh drei hŏng Aê Diê.
Anăn jing Klei Blŭ Aê Diê.
DRIÂO MMUN ÊLÂO KƠ KLEI MRÂO MRANG JĂK Ga 6,40
Allêluia. Allêluia. Khua Myang lač: Klei čiăng Ama Kâo jing hlei phung đaŏ kơ Anak, dưi mâo hdĭp hlŏng lar, leh anăn Kâo sơrăng brei kơ digơ̆ lŏ dơ̆ng hdĭp hlăm hruê knhal tuč êdei. Allêluia.
KLEI MRÂO MRANG JĂK Ga 6,37-40
Hlei đaŏ kơ Anak, dưi mâo hdĭp hlŏng lar, leh anăn Kâo sơrăng brei kơ digơ̆ lŏ dơ̆ng hdĭp hlăm hruê knhal tuč êdei.
Klei Mrâo Mrang Jăk Khua Yêsu Krist tui si Pô Kpă Yôhan.
37 Hlăk anăn, Khua Yêsu lač kơ phung buôn sang sơnei: “Jih jang phung Aê Diê Ama brei kơ kâo, sơrăng hriê kơ kâo s’aĭ; leh anăn hlei pô hriê kơ kâo, kâo amâo sơrăng suôt ti tač ôh. 38 Kyuadah kâo trŭn mơ̆ng adiê amâo djŏ čiăng ngă tui si klei kâo pô čiăng, biădah ngă tui si klei Pô tiŏ hriê kâo čiăng. 39 Klei Pô tiŏ hriê kâo čiăng, jing jih jang phung Ñu brei leh kơ kâo, kâo amâo sơrăng bi luč sa čô ôh, biădah sơrăng brei kơ diñu lŏ hdĭp ti hruê knhal tuč. 40 Djŏ sơnăn, klei Ama kâo čiăng jing, jih jang phung buh Anak Ñu, leh anăn đaŏ kơ Ñu, mâo klei hdĭp hlŏng lar; leh anăn kâo sơrăng brei digơ̆ lŏ hdĭp ti hruê knhal tuč”.
Anăn jing Klei Blŭ Aê Diê.
Klei Ngă Yang II
HRĂ DLĂNG 1 Is 25,6a.7-9
Aê Diê sơrăng bi rai mdjiê hlŏng lar yang klei djiê.
Hdruôm Hră Kpă mỡng Hră Isai Pô ba asăp Aê Diê.
6a Hruê anăn, ti čư̆ anei,
Aê Diê phung dĭng ktang sơrăng mdơ̆ng brei
kơ lu êdi buôn sang sa klei mnăm huă prăng :
7 Ti čư̆ anei, Ñu sơrăng hiêk lui hě chiăm guôm djăp buôn sang,
wăt chiăm guôm ti lu čar kwar.
8 Ñu sơrăng bi rai yang klei djiê hlŏng lar.
Aê Diê jing Pô Ti Dlông Hĭn
sơrăng sŭt bi thu êa ală mta ti bô̆ mta jih jang mnuih,
leh anăn ti tar rŏng lăn,
Ñu sơrăng lăm brei jih klei hê̆ñ mlâo ƀuôn sang Ñu.
Aê Diê lač msě sơnăn.
9 Hruê anăn, arăng sơrăng lač: “Anei jing Aê Diê drei,
drei tuôm hmăng guôn leh,
leh anăn mâo leh Ñu pap bi mtlaih.
Ñu yơh jing Aê Diê drei tuôm hmăng guôn leh.
Bơ̆ drei bi driâo hriêk hơ̆k kdơ̆k kyua mâo Ñu bi mtlaih.”
Anăn jing Klei Blŭ Aê Diê.
KLEI MMUÑ HĐĂP KPĂ Tv 24,6 & 7c.17-18.20-21 (Đ. c.3a)
Jih jang : Ơ Aê Diê, kâo mđĭ ai mngăt, mđĭ ai mngăt kơ Ih.
Sa čô :
- Ơ Aê Diê, Ih lŏ hdơr brei bruă tŭ klei khăp Ih êlam lĭn tuôm bi êdah leh dơ̆ng mơ̆ng hlŏng lar, mmông anei akâo lŏ hdơr brei. Akâo yua brei klei pap čiăng hdơr brei kơ kâo. Jih jang.
- Ai tiê ruă msě hrŭt, akâo ngă brei bi êđăp, leh anăn mtlaih bi êngiê kâo mơ̆ng êlan dleh knap. Akâo Aê Diê dlăng brei klei dleh dlah klei knap mñai wăt pap brei jih djăp klei soh kâo. Jih jang.
- Akâo mgang pioh asei hdĭp wăt mtlaih bi êngiê kâo, đăm lui ôh kâo hê̆ñ mlâo, kyuadah kâo kdê kđap hlăm Ih. Hmăng đei ai tiê doh ênuah wăt kpă jăk mgang răng kriê kâo, kyua kâo knang hmăng hlăm Ih. Jih jang.
HRĂ DLĂNG 2 Rm 8,14-23
Drei hmăng guôn Aê Diê bi mtlaih asei mlei kđeh drei da.
Hdruôm Hră Kpă mơ̆ng Hră Pô Kpă Pôl Bĭng kna m’ĭt kơ phung mnuih đaŏ Rôm.
14 Ơ ayŏng adei, hlei mâo Êwa Myang Aê Diê atăt ktrâo, jing anak Aê Diê s’aĭ. 15 Bi diih, diih ka mă tŭ ôh Êwa Myang ngă kơ diih mbliư̆ jing hlŭn leh anăn huĭ hyŭt msě si mphŭn dô, biădah Êwa Myang yơh ngă kơ diih jing phung anak, kyua mỡng anăn drei dưi iêô: “Abba ! Ama Ơi !” 16 Êwa Myang yơh bi mklă sĭt kơ kõ dlô drei, drei jing anak čô Aê Diê. 17 Sơnăn jing leh anak, sơnăn ăt jing mnuih dưn yua mơh, mâo Aê Diê brei dưn yua, sơnăn jing dưn yua hrăm mbĭt hŏng Khua Krist; kyua tơdah hlăk tŭ klei knap mñai hŏng Ñu, drei sơrăng dưi dưn klei guh k’ang hŏng Ñu.
18 Djŏ sơnăn, kâo bi mǐn sơnei : djăp klei knap mñai drei tŭ ară anei hĭn si dưi bi hmô hŏng klei guh k’ang Aê Diê sơrăng pok mdah hlăm drei. 19 Djăp mta mnơ̆ng hrih bi kngŏng dôk čang guôn hruê Aê Diê pok mdah Klei guh k’ang anak aneh Ñu. 20 Djŏ sơnăn, djăp mta mnơ̆ng hrih lě leh hlăm klei h’ăi mang, amâo djŏ kyua digơ̆ čiăng ôh, biădah kyua Aê Diê brei tŭ msě sơnăn; siăm dah, ăt adôk mơh klei knang hmăng 21 jing mâo hruê ăt sơrăng dưi bi mtlaih, amâo lŏ lě hlăm klei jhat rai ôh, biădah dưi hrăm hŏng anak aneh Aê Diê dưn mbĭt klei êngiê wăt klei guh k’ang. 22 Djŏ sơnăn, drei thâo: truh kơ ară anei, djăp mta mnơ̆ng hrih dôk bi ur krao leh anăn hnăr-hnăk msě si dơ̆ng mđai. 23 Amâo djŏ knong djăp mta mnơ̆ng hdĭp ôh, wăt drei ăt dôk ur krao mơh hlăm ai tiê: drei mă tŭ leh Êwa Myang msě si klei yuôm jăk mphŭn êlâo, biădah adôk hmăng guôn Aê Diê brei ênŭm klei dưi jing anak, si tô hmô bi mtlaih asei mlei kđeh drei da.
Anăn jing Klei Blŭ Aê Diê.
DRIÂO MMUN ÊLÂO KƠ KLEI MRÂO MRANG JĂK Mt 25,34
Allêluia. Allêluia. Khua Myang lač: Ơ phung mâo ama Kâo hmưi brei klei jăk, hriê bě dưn yua Ala Mtao prăp leh kơ diih, dơ̆ng mơ̆ng hrih lăn adiê. Allêluia.
KLEI MRÂO MRANG JĂK Lc 23,33.39-43
Hruê anei, ih sơrăng mâo dôk hŏng Kâo Ala Mtao Adiê.
Klei Mrâo Mrang Jăk Khua Yêsu Krist tui si Pô Kpă Luk.
33 Hlăk anăn, hlăk truh ti anôk pia jing “Klang Kŏ”, digơ̆ pơ̆ng Ñu ti kyâo bi kal, hrăm mbĭt hŏng dua čô mnuih kně jhat, sa tăng hnuă, sa tăng điâo. 39 Sa hlăm dua čô kně jhat arăng yuôl ti kyâo bi kal ăt mưč mač kơ Ñu: “Amâo djõ hě ǒng jing Krist? Mtlaih bě ǒng pô, leh anăn mtlaih wăt hmei da!” 40 Biădah pô adih ăl kơ ñu: “Ŏng dôk tŭ mbĭt sa klei bi kmhal, sơnăn Aê Diê, ŏng ăt kăn thâo huĭ lei ! 41 Drei tŭ sơnei jing djŏ năng, kyuadah năng hŏng klei ngă leh. Bi ñu anei ti mâo ngă klei soh lě ! ” 42 Leh anăn ñu lač kơ Khua Yêsu: “Ơ Yêsu ơi, hlăk Ih mŭt hlăm Ala Mtao Ih, akâo hdơr kơ kâo đa !” 43 Leh anăn Ñu lač kơ gơ̆: “Kâo lač sĭt kơ ih, hruê anei, ih sơrăng mâo dôk hŏng kâo ti Ala Mtao Adiê.”
Anăn jing Klei Blŭ Aê Diê.
Klei Ngă Yang III
HRĂ DLĂNG 1 2 Mcb 12,43-45
Yuda Markabê ngă leh knhuah jăk siam wăt prŏng yuôm, kyua lač dah mnuih djiê sơrăng lŏ dơ̆ng hdĭp.
Hdruôm Hră Kpă mơ̆ng Hră Markabê Hdruôm Tal Dua.
43 Hlăk anăn, Yuda Markabê hrui mguôp mâo hlăm brô dua êbâo prăk mah, leh anăn m’ĭt kơ Yêrusalem čiăng akâo myơr klei ngă yang kmhal klei soh; ñu ngă knhuah jăk siam wăt prŏng yuôm anei kyua lač dah mnuih djiê sơrăng lõ dơ̆ng hdĭp. 44 Boh sĭt klă, tơdah ñu amâo mâo čang hmang ôh phung dĭng ktang êbuh leh sơrăng lŏ dơ̆ng hdĭp, sơnăn kwưh brei kơ mnuih djiê jing bruă êbeh leh wăt mlŭk mgu. 45 Biădah kyua ñu mǐn kơ kdrê̆č pah mưn jăk siam êdi pioh brei kơ phung mnuih mdei ênang leh hlăm ai tiê knhuah jăk kpă, sơnăn anei jing sĭt klei mǐn knhuah jăk kpă wăt kpă jăk. Anăn yơh jing klei mta ngă kơ ñu akâo myơr klei ngă yang mtui brei klei soh kơ phung mnuih djiê leh, čiăng kơ digơ̆ dưi mâo mtlaih bi êngiê mơ̆ng klei soh.
Anăn jing Klei Blũ Aê Diê.
KLEI MMUÑ HĐẶP KPĂ Tv 41,2.3.5bcd (Đ. c. 3a)
Jih jang : Mngăt kâo mhao čiăng kơ Aê Diê, jing Aê Diê hdĩp hlõng lar.
Sa čô :
- Msě si hlô dliê hmăng čang ƀuh hnoh êa êngeh, mngăt kâo ăt hmăng čiăng dưi mâo dôk giăm Ih, Ơ Aê Diê. Jih jang.
- Mngăt kâo mhao čiăng kơ Aê Diê, jing Aê Diê hdĭp hlŏng lar. Hbil bě kâo dưi mŭt hlăm anôk Bô̆ Mta ? Jih jang.
- Ênuk nao kơ sang chiăm kpă kdruh k’ang truh kơ sang Aê Diê, hrăm hŏng lu asăp driâo hơ̆k bi mni, krah lu êdi mnuih bi bru kbin hơ̆k kdơ̆k. Jih jang.
HRĂ DLĂNG 2 Kh 21,1-5a.6b-7
Amâo sơrăng lŏ adôk klei djiê ôh.
Hdruôm Hră Kpă Klei Bi Êdah mơ̆ng Pô Kpă Yôhan Bĭng kna.
1 Kâo jing Yôhan, hlăk anăn kâo buh adiê mrâo lăn mrâo, kyuadah adiê hđăp lăn hđăp luč hě leh, leh anăn êa ksĭ kăn lŏ adôk lei. 2 Leh anăn kâo buh Buôn prŏng kpă jing Yêrusalem mrâo, mơ̆ng adiê, trŭn hriê mơ̆ng anôk Aê Diê, prăp êmiêt msě si sa čô mniê bi msiam ñu čiăng nao tŭ drông ung. 3 Leh anăn kâo hmư̆ mơ̆ng jhưng mtao mâo ênai ur ktang: “Anei jing sang juh Aê Diê dôk mbĭt hŏng djuê mnuih, Ñu sơrăng dôk mbĭt hŏng digơ̆. Digơ̆ sơrăng jing buôn sang Ñu, bi Ñu pô sơrăng jing Aê-Diê-dôk-mbĭt-hŏng-digơ̆. 4 Aê Diê sơrăng sŭt thu êa ală digơ̆. Amâo sơrăng lŏ adôk klei djiê; ăt kăn lŏ adôk lei klei djiê brŭ, ur krao wăt knap mñai, kyuadah djăp klei hđăp luč hě leh”.
5a Pô dôk ti jhưng mtao lač: “Ně anei Kâo mlih mrâo djăp mta klei. 6b Kâo jing Alpha wăt Ômêga, jing Klei Mphŭn wăt Tuč Ruê̆. Kâo yơh sơrăng brei kơ hlei mhao dưi mâo mnăm êa ti kŏ êa hdĭp hlŏng lar, biădah amâo dleh mưn prăk ôh. 7 Hlei kdơ̆ng dưi sơrăng mâo dưn yua klei yuôm jăk anăn. Kâo sơrăng jing Aê Diê kơ mnuih anăn, leh anăn mnuih anăn sơrăng anak Kâo”.
Anăn jing Klei Blũ Aê Diê.
DRIÂO MMUN ÊLÂO KƠ KLEI MRÂO MRANG JĂK x. Mt 11,25
Allêluia. Allêluia. Ơ Ama jing Khua Lăn Adiê, Kâo akâo bi mni kơ Ih, kyuadah Ih pŏk mdah leh klei myang hgăm Ala Mtao Adiê kơ phung đơ-điêt. Allêluia.
KLEI MRÂO MRANG JĂK Ga 11,17-27
Kâo yơh jing klei lŏ dơ̆ng hdĭp wăt jing klei hdĭp.
Klei Mrâo Mrang Jăk Khua Yêsu Krist tui si Pô Kpă Yôhan.
17 Hlăk truh ti Bêthani, Khua Yêsu buh Lasar arăng dơr leh hlăm msat mâo pă hruê leh. 18 Bêthani kbưi hŏng Yêrusalem, hlăm brô tlâo wang kilômêt. 19 Lu phung Israel hriê triêk mbha klei ênguôt hõng Mart wăt Maria, kyuadah adei digơ̆ mrâo djiê. 20 Mrâo hmư̆ thâo Khua Yêsu hriê, Mart nao drông mtam Khua Yêsu. Bi Maria dê sơnăn dôk hlăm sang. 21 Mart lač kơ Khua Yêsu: “Ơ Khua, tơdah mâo Ih ti anei, adei kâo amâo djiê ôh. 22 Biădah ară anei kâo thâo: Djăp ya klei Ih akâo kơ Aê Diê, Aê Diê sơrăng brei kơ Ih”. 23 Khua Yêsu lač: “Adei ih sơrăng lŏ dơ̆ng hdĭp !” 24 Mart lač: “Kâo thâo adei sơrăng lõ dơ̆ng hdĭp, hlăk phung djiê lŏ dơ̆ng hdĭp hlăm hruê knhal tuč êdei”. 25 Khua Yêsu lač mtam: “Kâo yơh jing klei lŏ dơ̆ng hdĭp wăt jing klei hdĭp. Hlei đaŏ kơ Kâo, sơnăn khă djiê leh dưn, ăt sơrăng dưi mâo hdĭp. 26 Hlei hdĭp wăt đaŏ kơ kâo, amâo sơrăng tuôm bhiăn djiê ôh. Ih đao mơh msě sơnăn ?” 27 Mart lač: “Ơ khua, Ơ. Kâo ăt đaŏ kơ Ih jing Khua Krist, Anak Aê Diê Pô bhiăn hriê ti lăn ala”.
Anăn jing Klei Blŭ Aê Diê.